Неліктен туристер Алматыны демалыс үшін жиі таңдауда – 2025 жылғы деректер

Алматы өңірдегі туристік картадағы позициясын күшейтіп келеді: демалыс пен бос уақытқа арналған сапарларға қызығушылық артып отыр. Бұл туралы қаланың 2025 жылғы туризм жөніндегі есебінде айтылған. Зерттеуді Almaty Tourism Bureau және Mastercard Tourism Insights жүргізген, деп хабарлайды Kapital.kz іскерлік ақпарат орталығы қалалық әкімдік баспасөз қызметіне сілтеме жасап.

«Алматыдағы туристік сапарлар құрылымында рекреациялық туризмнің рөлі күшейіп келеді. 2025 жылы қалаға келген қонақтардың 84%-ы жеке мақсатпен – демалыс пен бос уақыт өткізу үшін келген, бұл өткен жылмен салыстырғанда 5 пайыздық пунктке жоғары. Мұндай динамика қаланың туристік позициясының өзгергенін көрсетеді – Алматы табиғи ландшафттар, белсенді демалыс және қалалық бай мәдени орта тоғысқан lifestyle-туризм бағыты ретінде жиі қабылдануда. Орталық Азия мен Кавказдың Ташкент, Баку, Тбилиси және Бішкек секілді өзге қалаларымен салыстырғанда, бұл үрдіс бүкіл өңірде байқалады, алайда Алматыда ол айқынырақ көрінеді. Демалыс сапарларының жоғары үлесі қаланың табиғи және рекреациялық мүмкіндіктеріне тұрақты қызығушылық бар екенін растайды», — делінген құжатта.

Есепте туристердің саяхат форматы бойынша құрылымындағы өзгерістер де тіркелген. Жеке туристер әлі де ең ірі сегмент болып қалып отыр және барлық қонақтардың шамамен 37%-ын құрайды, алайда олардың үлесі біртіндеп азайып келеді. Бұл ретте ең жоғары өсімді отбасылық сегмент көрсетіп отыр — ол 2024 жылмен салыстырғанда 2,4 пайыздық пунктке артқан.

Саяхаттың түріне қарай Алматыдағы туристік ағын келесідей бөлінеді:

37% — жеке саяхатшылар;

22% — жұппен саяхаттар;

21% — отбасылық сапарлар;

20% — достармен сапарлар.

Өткен жылмен салыстырғанда топтық туризмнің үлесі 3 пайыздық пунктке артқан, бұл сапар форматтарының кеңеюін және туристік сұраныс құрылымының әртараптануын көрсетеді.

Сарапшылардың пікірінше, мұндай саяхат моделі Алматының белсенді демалыс қаласы ретіндегі позициясына сәйкес келеді. Табиғи ресурстар, таулы маршруттар, гастрономия және мәдени өмір жеке сапарлардан бастап отбасылық және достық туризмге дейін әртүрлі форматтағы саяхаттарға жағдай жасайды.

Жалпы, 2025 жылғы талдау қорытындысы бойынша Алматыға деген қызығушылықтың тұрақты өсімі байқалады. Қаланың туристік өнімі табиғи және рекреациялық ресурстар негізінде белсенді дамып келеді, ал Азия нарықтарынан келетін сұраныс туристік ағындардың одан әрі өсуінің негізгі драйверлерінің біріне айналып отыр.

Бұған дейін ірі халықаралық іс-шаралар Алматыға туристік қызығушылықты айтарлықтай арттырып, қаланың экономикалық белсенділігін ынталандыратыны хабарланған. Freedom Holding Corp. құрылымындағы Freedom Events компаниясы серіктеспен бірге Қазақстанда Cirque du Soleil гастролін ұйымдастыруда. Сондай-ақ осы жылдың күзінде Қазақстанның екі қаласында Энрике Иглесиастың концерті өтеді. Мамыр айында елде Timbaland және Busta Rhymes өнер көрсетпек.