Le Méridien: саяхат – өмір сүру өнері

Le Méridien елу жыл ішінде Air France жобасынан эстетика, мәдениет және қонақжайлықты біріктіретін жаһандық брендке айналды. Ол халықаралық форматтағы еуропалық талғампаздықтың символы болды және 1972 жылы бастау алған саяхат – өмір сүру өнері деген негізгі идеяны әлі де сақтап келеді.

Air France және Париждегі алғашқы отель

Le Méridien бренді 1972 жылы Air France авиакомпаниясы өз жолаушылары мен экипаждарына арналған қонақүйлер желісін құруды шешкен кезде пайда болды. Сол жылы алғашқы нысан – Le Méridien Etoile (қазіргі Le Méridien Paris Arc de Triomphe) ашылды. 1000 нөмірі бар бұл қонақүй Париждегі Конгрестер сарайының қарсы бетінде орналасқан еді. Ол жай ғана әуе сапарынан кейін демалатын орын емес, француз стилі мен қонақжайлығының рухын көрсете алатын кеңістік болды.

Бренд неліктен «меридиан» деп аталды? Компанияның түсіндіруінше, атау бүкіл жер шарын бойлай өтетін жағрапиялық меридиандарды еске сала отырып, брендтің халықаралық бағдарын білдіреді.

Құрылғаннан кейін екі жыл өткенде қонақүйлер желісіндегі нысандар саны Еуропа мен Африкада 10-ға жетті, ал 1970 жылдардың соңына қарай әлем бойынша 20-дан астам қонақүй ашылған еді.

«1960 жылдары француз авиациялық брендінің стилінде пайда болған концепция біз үшін фирмалық стильді дамыту кезінде шабыт көзі болды. Біз бұл эстетиканы анықтау үшін біздің бірегей түп-тамырларымыз – реактивті ұшақтармен саяхат сән саналған кезеңге жүгіндік. Сол дәуірдің культтік модерн дизайны саяхатшылардың қабылдауына ықпал етті және бізді әлі күнге дейін қатты шабыттандырады», – дейді Le Méridien.

Бақылау үшін күрес

1990 жылдарға қарай Le Méridien Еуропаның ең танымал қонақүй желілерінің біріне айналды.

1994 жылы шығындарды азайту шаралары аясында Air France Le Méridien акцияларының 57,3%-ын британдық Forte Group компаниясына 207 млн долларға сатты. Сол кезде желіде 58 қонақүй бар еді.

Сату туралы бұл шешім Le Méridien үшін жарты жылға созылған күрестің нәтижесі болды. Британдық Forte, немістің Kempinski және француздың Accor компаниялары желіні өз бақылауына алуға тырысты. 1994 жылдың мамырында француз үкіметі Accor ұсынысын қолдап, желінің француздар қолында қалуын қалағаны айтылды. Үкімет Accor-ға акцияларды сатуға Air France компаниясына қысым жасаған, өйткені авиакомпанияға 20 млрд франк көлемінде қаржылық көмек қажет болған.

Air France 1994 жылдың 1 қаңтарынан 1995 жылдың наурызына дейін 3,7 млрд франк шығын болатынын болжаған, дегенмен 1993 жылғы 8,48 млрд франк шығынмен салыстырғанда жақсырақ еді.

Ал Еуропалық комиссия жоғары баға ұсынған Forte-ты қолдады. 1994 жылдың қыркүйегінде Forte Crédit Foncier de France, Crédit Lyonnais және басқа акционерлерден желінің қалған акцияларын сатып алуға ниетті екенін мәлімдеді.

Әрі қарай не болды

Алайда желі Forte бақылауында ұзақ болмады. 1996 жылдың қаңтарында британдық Granada конгломераты Forte-тың бақылау пакетін 5,9 млрд долларға сатып алды. Бұл компания басшылығының еркіне қарсы жасалған сатып алу болды.

Granada түрлі акционерлерді Forte-ты оларға сатуға көндіре алды. Рокко Форте (негізін қалаушының ұлы) Granada компаниясы Forte активтерінің бір бөлігінен айырады деп алаңдаған еді.

Бұл ішінара рас болды. 1996 жылдың мамырында Granada Forte Hotels желісінің 18 люкс-қонақүйін сататынын, бірақ Meridien Hotels желісіндегі 85 қонақүйді сақтайтынын хабарлады.

Forte мен Compass Group компанияларының 2000 жылғы бірігуі және кейіннен бөлінуі нәтижесінде Forte Hotels бөлімшесінің қалған үш бренді – Le Méridien, Heritage Hotels және Posthouse Forte – Compass иелігіне өтті.

Иелердің жиі ауысуы – Forte, Granada, Compass – Le Méridien-нің стратегиялық дамуын баяулатса да, бренд өзінің еуропалық талғампаздық мәртебесін сақтап қалды.

2001 жылдың мамырында жапондық Nomura Group Le Méridien Hotels & Resorts желісін Compass-тан 1,9 млрд фунт стерлингке сатып алды.

Жаңа ғасыр: Starwood дәуірі

2000 жылдардың басында 11 қыркүйек оқиғасы, атипиялық пневмония және Ирактағы соғыс салдарынан туризм құлдырап, Le Méridien қиындықтарды бастан кешті. Le Méridien қоржынындағы шамамен 125 қонақүй Lehman Brothers бақылауына өтті. Келісім құны 700 млн фунт стерлингті құрады. Банк бұрын салған 200 млн фунт стерлинг инвестициясының бір бөлігін құтқару үшін осылай әрекет етуге мәжбүр болды. Сол уақытта желіні америкалық Starwood компаниясы басқарды.

2005 жылдың қарашасында Starwood Le Méridien-ді шамамен 225 млн долларға сатып алды. Келесі жеті жылда бренд толық трансформациядан өтті. Starwood сатып алған бастапқы иеліктен 40-тан астам қонақүй шығарылды, тағы 25 нысан жаңғыртудан өтті.

2005-2010 жылдар аралығында Starwood Le Méridien брендімен Сан-Франциско, Миннеаполис, Филадельфия (АҚШ), Панама-сити (Панама), Шанхай, Чунцин, Сямэнь (Қытай), Бангкок (Таиланд), Тайбэй (Тайвань) секілді әлемнің ірі қалаларында 20 жаңа қонақүй ашты. Сонымен қатар Алжирдегі Оран, Стамбул, Каир, Лагос, Чжэнчжоу, Сиань, Лонавала, Махабалешвар, Хошимин және Дохада жаңа отельдер ашу жоспары жарияланды.

2006 жылы брендтің мәдени кураторы ретінде Жером Санс тағайындалды, сондай-ақ өнер мен дизайнды қонақүй тәжірибесіне интеграциялайтын LM100 бағдарламасы іске қосылды.

Жаһандық кеңею және қазіргі бейнесі

2010 жылдары Le Méridien халықаралық нарықтарда белсенді өсті. Қытайда, Үндістанда, Таяу Шығыста және Африкада жаңа нысандар ашылды. Алжирдегі Le Méridien Oran Hotel & Convention Centre аймақтағы ең ірі конгресс-орталықтардың бірі – символдық жоба болды.

Бренд өзінің визуалды эстетикасын – жарық, геометрия және ұстамды талғампаздықты сақтап келеді. Le Méridien сондай-ақ Unlocking Destinations концепциясын дамытады. Ол әр қонақүй қонақтарға қаланың мәдениетін кофе, өнер, музыка сияқты жергілікті детальдар арқылы ашуды ұсынып отырады.

2016 жылы Marriott International компаниясы Starwood-ты сатып алды. Осылайша Le Méridien әлемдегі ең ірі қонақүй корпорациясының қоржынына енді. Бұл брендке жаһандық сату жүйесіне және Marriott Bonvoy бағдарламасына қол жеткізуге мүмкіндік берді, сөйте тұра шығармашылық дербестігін сақтап қалды.

Қазіргі таңда Le Méridien upper upscale сегментінде жұмыс істейді: еуропалық талғампаздық пен мәдени тәжірибеге негізделген қонақүйлік стильді ұсынады. Басты идея – стильмен және талғаммен саяхаттауға шабыт беру. Бұл illy кофесінің ерекше иісі, таңғы ас беру стилі, музыка жинақтары мен лоббидегі арт-инсталляциялар сияқты детальдарда көрініс табады.

Жоғарыда аты аталған illy кофесімен серіктестік, сондай-ақ Нью-Йоркте үш Мишлен жұлдызды мейрамханасы бар әйгілі бас аспаз Жан-Жорж Вонгерихтенмен жұмыс секілді гастрономиялық бастамалар да маңызды рөл атқарады. Оның. Жан-Жорж Вонгерихтенмен бірге жасалған Le Méridien Breakfast – желінің фирмалық белгісіне айналды.

Бүгінде желінің 35-тен астам елде 120-дан артық қонақүйі бар.

Бренд бәсекенің күшеюі, lifestyle-сегменттің дамуы, сондай-ақ экологиялық тұрақтылыққа деген сұраныс сияқты сын-қатерлермен бетпе-бет келуде. Marriott International экологиялық жауапкершілік стратегиясын дамытып, Le Méridien энергия үнемдеу технологияларын, пластиктен бас тартуды және көміртек ізін азайтуды енгізуде.

Негізгі міндет – классика мен заманауилықтың арасындағы тепе-теңдікті сақтау және брендтің еуропалық болмысын жаңа буын саяхатшыларға жеткізу.