СІМ қазақстандықтардың ЕО визасын неліктен ұзақ күтетінін түсіндірді
Қазақстан азаматтарына құжаттарды алдын ала тапсыру ұсынылады
ҚР Сыртқы істер министрлігі Еуропалық одақ елдеріне виза алуға берілген өтініштердің ұзақ қаралу себебін түсіндіріп, ЕО-мен визалық режимді жеңілдету бойынша келіссөздердің барысы туралы айтып берді, деп хабарлайды Kazinform агенттігі тілшісі.
ҚР СІМ ресми өкілі Ерлан Жетібаев мәлімдегендей, бұл жағдай жазғы туристік маусымның басталуына орай қазақстандықтардың шетелдік өкілдіктерге жаппай жүгінуінен туындаған болуы мүмкін.
«Біз бұл мәселеден хабардармыз және барлық қажетті ақпаратты әріптестерімізге жеткізіп отырмыз. Дегенмен виза беру — әр мемлекеттің егемен құқығы екенін, яғни олар бұл мәселені өз заңнамасы аясында қарастыратынын атап өткім келеді. Қазіргі уақытта азаматтарымызға құжаттарды алдын ала тапсыруды және олардың түрлі санаттар бойынша қойылатын барлық талаптарға сай болуын қадағалауды ғына ұсына аламын», — деді Ерлан Жетібаев.
Сондай-ақ ол Қазақстанның Еуропалық одақпен визалық талаптарды жеңілдету және тұлғаларды реадмиссиялау бойынша келіссөздерді жалғастырып жатқанын еске салды. Консультациялардың үшінші кезеңі Брюссельде өтті.
«Жалпы, бұл жұмыстың өте сәтті жүріп жатқанын айта аламын. Жақын арада толығырақ ақпаратпен бөлісе аламыз деп ойлаймын», — деп атап өтті ол.
Еске сала кетейік, қос тарап делегацияларының Виза беруді жеңілдету туралы келісім және Реадмиссия туралы келісім жобалары бойынша кезекті кездесуі 12 маусымда өткен болатын.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
