• Басты бет
• Мемлекет
• Прокуратура құрылыс компанияларының салықтан жалтару үшін қолданған айла-амалдарын анықтады

Прокуратура құрылыс компанияларының салықтан жалтару үшін қолданған айла-амалдарын анықтады

Кәсіпорындар сатылған пәтерлердің нақты санын жасырып, мәмілелерді сыйға тарту шарты ретінде рәсімдеп келген

Шығыс Қазақстан облысының прокуратурасы құрылыс салушылардың салықты азайту үшін қолданған заңсыз әдістерін әшкереледі, деп хабарлайды Kapital.kz іскерлік ақпарат орталығы облыстық прокуратураның баспасөз қызметіне сілтеме жасап.

«Облыс прокуратурасы көппәтерлі тұрғын үйлерді салумен айналысатын кәсіпорындардың салықты толық төлеуіне талдау жүргізді. Тексеріс барысында жекелеген құрылыс салушылардың салық міндеттемелерін азайтуға бағытталған қулықтарға барғаны белгілі болды. Атап айтқанда, кәсіпорындардың табысын қолдан төмендету мақсатында сатылатын тұрғын үйлер мен коммерциялық нысандардың құнын кемітіп көрсету, сатылған пәтерлердің нақты санын жасыру, сондай-ақ кейбір мәмілелерді сыйға тарту шарттары арқылы рәсімдеу деректері анықталды», — делінген прокуратура хабарламасында.

Талдау қорытындысы бойынша прокуратура органдары прокурорлық қадағалау шараларын қолданып, соның негізінде салық органдары тиісті тексерулерді бастады. Қабылданған шаралардың нәтижесінде мемлекет бюджетіне 420 миллион теңгеден астам қаражат өндірілді.

Бұған дейін Астанада 61 құрылыс компаниясының тұрғын үйлерді заң талаптарын бұза отырып сатқаны хабарланған болатын.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Сізге қызықты болуы мүмкін

Kapital.kz-ті оқыңыз