Мемлекетке құны 1,8 млрд теңге болатын орман қорының жерлері қайтарылды
Жер телімдері мақсаты бойынша пайдаланылмаған
Ақмола облысында мемлекетке құны 1,8 млрд теңгелік орман қорының жерлері қайтарылды, деп хабарлайды Kapital.kz іскерлік ақпарат орталығы облыстық прокуратураның баспасөз қызметіне сілтеме жасап.
Қадағалау органының мәліметінше, Бұланды ауданының прокуратурасы орман заңнамасының сақталуын талдау барысында туристік кластердің дамуына кедергі келтірген жайттарды анықтады.
«Орман пайдаланушылардың мемлекеттік орман қоры телімдерін мақсаты бойынша, яғни сауықтыру, рекреациялық, туристік және спорттық бағытта пайдаланбай отырғаны белгілі болды», - делінген хабарламада.
Прокурорлық қадағалау шараларының нәтижесінде, жалпы кадастрлық құны 1 миллиард 800 миллион теңге болатын орман қорының жер телімдері мемлекетке қайтарылды. Прокуратураның мәліметінше, бұл жерлер алдағы уақытта әлеуетті инвесторларға туристік бизнес ұйымдастыру үшін қайта беріледі.
Бұған дейін дәл осы өңірде 100 гектардан астам орман қорының жері мемлекет меншігіне алынған болатын.
Сондай-ақ Түркістан облысында мемлекетке 2,9 мың гектардан астам ауыл шаруашылығы жері қайтарылса, Жамбыл облысында бұл санаттағы жерлердің мақсатқа сай пайдаланылмауы анықталды (жайылымдар жыртылып, егістікке айналған).
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
