• Басты бет
• Мемлекет
• Қазақстаннан 12 тоннаға жуық жанар-жағармай материалдарын заңсыз шығару әрекеті әшкереленді

Қазақстаннан 12 тоннаға жуық жанар-жағармай материалдарын заңсыз шығару әрекеті әшкереленді

Елде отынның шетелге заңсыз тасымалдануына тосқауыл қою шаралары күшейтілді

Соңғы айда ел аумағынан 12 тоннаға жуық жанар-жағармай материалын (ЖЖМ) алып шығу әрекеті жасалған. Бұл деректер ЖЖМ заңсыз айналымына тосқауыл қою және көліктерді өз бетінше қайта жабдықтауға қарсы іс-қимылды күшейту барысында анықталды, деп хабарлады Polisia.kz.

Ішкі істер министрлігі жанармай багі үлкейтілген көліктерді пайдаланып, мұнай өнімдері мен жанар-жағармайды елден заңсыз шығару деректерін анықтау және олардың жолын кесу бойынша жоспарлы жұмыстарды тұрақты жүргізіп келеді.

Бүгінде мемлекеттік шекара арқылы өтетін 48 автомобиль өткізу пунктінде патрульдік полицияның 59 бекеті жұмыс істеп тұр. Мамандар ЖЖМ заңсыз тасымалдауды, соның ішінде жүк сыйымдылығы жоғары жол талғамайтын көліктерді пайдалану фактілерін әшкерелеуде. Шекара маңындағы Жамбыл, Түркістан және Маңғыстау облыстарына ерекше назар аударылып отыр. Бұл өңірлерде контрабанданың жолын кесу, конструкциясы заңсыз өзгертілген көліктерді анықтау бойынша қосымша рейдтер жүруде.

Сонымен қатар, автокөліктерді заңсыз қайта жабдықтаумен айналысатын немесе қажетті рұқсат құжаттарынсыз жұмыс істеп тұрған техникалық қызмет көрсету станцияларын анықтау жұмыстары да қатар қолға алынды.

Мәселен, Қордай ауданының Қордай ауылында полиция қызметкерлері мемлекеттік кірістер органдарының өкілдерімен бірлесіп, қосымша жанармай бактарын орнатумен айналысқан 16 техникалық қызмет көрсету станциясын тексерді.

Нәтижесінде алты нысан иесіне қатысты әкімшілік хаттама толтырылды. Тек соңғы айдың ішінде ғана полицейлер 12 тоннаға жуық ЖЖМ-ды шекарадан асырмай, жолын кесті. Жанармай бактары заңсыз үлкейтілген 54 автокөлік анықталып, олардың иелері әкімшілік жауапкершілікке тартылды.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Сізге қызықты болуы мүмкін

Kapital.kz-ті оқыңыз