- Басты бет
- Технологиялар
- Қазақстан мен Қытай агроғалымдары шегірткеге қарсы жаңа биопрепаратты сынады
Қазақстан мен Қытай агроғалымдары шегірткеге қарсы жаңа биопрепаратты сынады
Түркістан облысында марокко шегірткесіне қарсы экологиялық қауіпсіз технология сыналды
Түркістан облысында марокко шегірткесіне қарсы жаңа буындағы биологиялық препараттың далалық сынақтары сәтті аяқталды. Халықаралық зерттеу нәтижелері экологиялық қауіпсіз өнімнің жоғары тиімділігін көрсетіп отыр, деп хабарлайды Kapital.kz іскерлік ақпарат орталығы Ауыл шаруашылығы министрлігіне сілтеме жасап.
Жоба шекаралас аймақтардағы зиянкестермен күресу мақсатындағы бірлескен халықаралық бағдарлама аясында жүзеге асырылды. Тәжірибелік жұмыстарға Ж. Жиембаев атындағы Қазақ өсімдік қорғау және карантин ғылыми-зерттеу институты мен Қытай ауыл шаруашылығы ғылымдары академиясының Өсімдік қорғау институтының мамандары қатысты.
Далалық сынақтар Түркістан облысы Қазығұрт ауданының жайылымдық алқаптарында өтті. Негізгі биологиялық агент ретінде Metarhizium anisopliae энтомопатогенді саңырауқұлағы қолданылды.
Мамандардың бағалауынша, бұл технология дәстүрлі химиялық инсектицидтердің тиімді әрі экологиялық қауіпсіз баламасы бола алады. Ол қоршаған ортаға және жайылымдарға зиян келтірмейді.
Зерттеу барысында зиянкестердің жойылу көрсеткіштері күн сайын тіркелді. Динамика мынадай нәтижені көрсетті: 3 тәулікте жәндіктердің зақымдануының алғашқы белгілері байқалды. 5-тәулікте шегірткелердің қырылу деңгейі 70–80%-ға жеткен. Ал 9-тәулікте тәжірибелік топтардағы барлық дарақтың 100% толық қырылды.
Ауыл шаруашылығы министрлігі марокко шегірткесі отандық ауыл шаруашылығы дақылдары мен жайылымдарға орасан зор материалдық зиян келтіруге қабілетті ең қауіпті зиянкестердің бірі екенін атап өтті. Осыған байланысты, өсімдіктерді қорғаудың биологиялық әдістерін енгізу — отандық агроөнеркәсіп кешенін экологияландыру мен халықаралық ESG стандарттарына бейімдеудің негізгі бағыты ретінде қарастырылуда.
Сынақ нәтижелері биопрепараттың тиімділігін дәлелдеп отыр. Алдағы уақытта зерттеушілер тобы сынақтарды Қазақстанның басқа да климаттық аймақтарында кеңейтуді, сонымен қатар технологияны шегіртке зиянкестерін мониторингтеу және олардың санын реттеудің мемлекеттік жүйесіне енгізу бойынша практикалық ұсынымдар әзірлеуді жоспарлап отыр.
Бұған дейін Үкімет Қазақстанда 2026 жылғы егіс науқаны аяқталғанын хабарлады. Көктемгі дала жұмыстары еліміздің барлық өңірінде белгіленген агротехникалық мерзімде жүргізілді.
Сонымен қатар Түркістан облысында агродрондар өндірісі іске қосылды. Агродрондар ауыл шаруашылығы дақылдарын бүрку жұмыстарын жүргізуге арналған.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
