• Басты бет
• Мемлекет
• Алакөл мен Бурабайдағы туристік маусым: Әкімдіктер неге инфрақұрылымды уақытында дайындай алмады?

Алакөл мен Бурабайдағы туристік маусым: Әкімдіктер неге инфрақұрылымды уақытында дайындай алмады?

Министр кейбір учаскелерде жағажай инфрақұрылымы әлі де ұлттық стандарт талаптарына сәйкес келмейтінін айтты

Қазақстанда жазғы шомылу маусымы ресми түрде басталғанымен, ең танымал курорттық аймақтардағы инфрақұрылым мәселесі әлі де «бас ауруы» болып қалып отыр. Туризм және спорт министрі Ербол Мырзабосынов Үкімет отырысында бірқатар өңірдегі ірі жобалар баяу жүріп жатқанын айтты, деп хабарлайды Kapital.kz іскерлік ақпарат орталығының тілшісі.

Ербол Мырзабосынов Министрліктің талабы бойынша барлық өңірлер 15 маусымға дейін дайындықты аяқтауы тиіс еді.

«Жазғы маусымға дайындық аясында өңірлерде инфрақұрылымды жетілдіру, сервистің сапасын арттыру, демалушылардың қауіпсіздігін қамтамасыз ету және курорттық аумақтарды жаңғырту бойынша шаралар қабылдануда. Бұл бағыттағы жұмыстың жақсы үлгісі ретінде Алматы облысын атап өткім келеді. Қапшағай су қоймасының жағалауында коммуналдық жағажайларды жаңғырту жұмыстары жүргізілуде. Нәтижесінде заманауи әрі жайлы инфрақұрылым қалыптасуда. Аумақтарды абаттандыруға, санитариялық жағдайға және қоғамдық қауіпсіздік мәселелеріне ерекше назар аударылуда», деді министр.

Алайда министрдің сөзінше, бірнеше облыста ірі жобалар тоқтап тұр немесе баяу жүріп жатыр. Мәселен, Жетісу облысында Алакөлдің жағалауын бекітуге ақша жетпей жатса, Қарағанды облысы Торанғалық кентінде магистральдық су құбырын салу үшін қосымша қаржыландыру қажет. Сонымен қатар Щучинск-Бурабай курорттық аймағында Громотуха өзені арқылы өтетін көпір салу және курорттық аумақтағы көлік жүктемесін азайтуға бағытталған жол инфрақұрылымын жаңғырту жобаларын қаржыландыру керек.

«Абай облысында электрмен жабдықтау, жағалауды бекіту, айналма автомобиль жолын, блокты-модульдік тазарту құрылыстарын және қатты тұрмыстық қалдықтар полигонын салу сияқты бірқатар маңызды инфрақұрылымдық жобалар бойынша құрылыс-монтаж жұмыстары әлі күнге дейін басталған жоқ», деп қосты ведомство басшысы.

ТСМ басшысының сөзінше, бұл жағдай тек ірі нысандарға ғана емес, қарапайым сервиске де әсер етіп отыр.

«Кейбір учаскелерде жағажай инфрақұрылымы әлі де ұлттық стандарт талаптарына сәйкес келмейді. Қалқымалы белгілер, құтқару мұнаралары, киім ауыстыратын кабиналар және санитарлық тораптар жеткіліксіз. Сондықтан әкімдіктер аталған мәселелерді жазғы маусым басталғанға дейін толық шешуі қажет», деді Ербол Мырзабосынов.

Бұған дейін Қазақстанның Көлік министрлігі туристік бағыттарға баратын негізгі автожолдар маусымға дайын екенін мәлімдеген еді.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Сізге қызықты болуы мүмкін

Kapital.kz-ті оқыңыз