Қазақстанда 25 халықаралық қонақүй ашылады
Hilton және Marriott желілерінің ауқымды жобалары 2027 жылдың соңына дейін іске қосылмақ
Қазақстан туризм саласын серпітуге бағытталған ауқымды жұмыстарды бастады. Қазіргі уақытта елімізде жалпы құны 1,3 триллион теңге болатын 328 инвестициялық жоба қолға алынып жатыр. Салаға серпін беретін бұл жобалар 10 мыңға жуық адамды тұрақты жұмыспен қамтуға жол ашады. Бұл туралы Үкімет отырысында Туризм және спорт министрі Ербол Мырзабосынов мәлімдеді, деп хабарлайды Kapital.kz іскерлік ақпарат орталығының тілшісі.
Бүгінде сәтті жүзеге асқан ірі жобалардың қатарында Алматы облысындағы 57 миллиард теңгелік Oi-Qaragai тау курорты, Қонаев қаласындағы 11 миллиард теңгелік ASP Arena спорттық-ойын-сауық кешені және жол бойындағы көпфункционалды PetroRetail PFS сервис нысаны (құны 2 миллиард теңге) бар.
«Бұдан бөлек, халықаралық деңгейдегі 25 қонақүй пайдалануға беріледі. 2027 жылдың соңына дейін аяқталатын ірі жобалардың қатарында Шымкенттегі құны 17,5 миллиард теңгелік Hilton қонақүйі, Қонаевтағы 28 миллиард теңгелік Marriott қонақүй кешені және 53,3 миллиард теңгелік «Жібек жолы» курорттық-ойын-сауық кешені бар», - деді министр.
Ербол Мырзабосынов Қазақстанның туристік бренді шетелде де белсенді насихатталып жатқанын жеткізді. Еліміз туралы әлемдік бұқаралық ақпарат құралдарында, интернет пен әлеуметтік желілерде кеңінен жазылуда. Мәселен, Қазақстан Қытай, Үндістан, Жапония, Оңтүстік Корея және Ресейден келген шығармашылық топтардың тележобалар түсіруіне қолдау көрсетті. Отандық туризм туралы материалдар шетелдік 9 онлайн-басылым мен 8 цифрлық және баспа медиа-платформасында жарық көрді. Бұл мақалалар мен сюжеттер 53 миллионнан астам оқырманға жол тартты. Ал TikTok пен Qunar платформаларындағы жарнамалық науқандар 19 миллионнан астам қаралым жинады. Жыл басынан бері Үндістан, Қытай және Жапониядан келген 27 шетелдік БАҚ өкілі мен туроператор үшін арнайы төрт танысу туры ұйымдастырылды.
«Қазақстанның туристік әлеуетін арттыру үшін Қытай нарығында маркетингтік жобаларды қолға алу және Оңтүстік Кореяның Hana Tour туристік платформасымен серіктестікті нығайту жоспарланып отыр», - деп атап өтті ведомство басшысы.
Еске сала кетейік, туризм саласының Қазақстан экономикасына қосқан үлесі 5 триллион теңгеге жетті. Салаға тартылған инвестиция көлемі де өткен жылмен салыстырғанда айтарлықтай өсіп, 1,3 триллион теңгені құрады, бұл — көрсеткіштің 33 пайызға артқанын білдіреді. Қазір Қазақстанда конгрестік-іскерлік туризм бағыты жақсы дамып келеді. Елімізде өткен 13 халықаралық іс-шара мемлекет қазынасына шамамен 18 миллион доллар табыс әкелді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
