• Басты бет
• Технологиялар
• Қазақстанда ЖСН-ді мобильді қосымшамен ресімдеуге болады

Қазақстанда ЖСН-ді мобильді қосымшамен ресімдеуге болады

QazETA шетелдіктерге Қазақстанның мемлекеттік қызметтерін қашықтан пайдалануға жол ашады

Шетел азаматтары бұдан былай бірқатар көші-қон құжаттарын, соның ішінде жеке сәйкестендіру нөмірін (ЖСН) QazETA мобильді қосымшасы арқылы тікелей смартфоннан ресімдей алады. Бұл туралы Ішкі істер министрі Ержан Сәденов мәлімдеді, деп хабарлайды Kapital.kz іскерлік ақпарат орталығының тілшісі.

Министрдің айтуынша, қазір халықаралық әуежайлар мен ең ірі шекаралық өткізу бекеттерінде елге келген шетелдіктерге QR-коды бар арнайы туристік карталар беріледі. Онда елде болу ережелері, шұғыл қызметтердің байланыс нөмірлері мен ұялы байланыс операторлары туралы маңызды мәліметтер қамтылған.

«QazETA мобильді қосымшасын әзірлеп жатырмыз, оның көмегімен шетелдіктер ЖСН ресімдеуден бастап, бұдан да көп көші-қон қызметін пайдалана алады. Қазіргі уақытта заңнамаға қажетті түзетулер Сенатта қаралып жатыр», — деді Ержан Саденов үкімет отырысында.

Сондай-ақ ведомство басшысы Қазақстан шетелдік қонақтар үшін елге келудің электронды жүйесін жетілдіріп жатқанын атап өтті. Қазір 105 мемлекеттің азаматтары дипломатиялық өкілдіктерге бармай-ақ, электронды виза алып келе алады. Ал шетелдіктердің келгені туралы хабарламаны қабылдаушы тарап онлайн-сервистер арқылы жолдайды.

Бұдан бөлек, 1 қаңтардан бастап шетелдіктер eResidency бағдарламасы арқылы ЖСН-і бар цифрлық ID-картаны ресімдеу мүмкіндігіне ие болды. Бұл құжатты Қазақстанға келмей-ақ, сырттай алуға болады.

Сонымен қатар жиында Экология және табиғи ресурстар министрі Ерлан Нысанбаев бір жылда ұлттық парктерге келушілер саны 900 мың адамға артқанын мәлімдеді. Ал Туризм және спорт министрі Ербол Мырзабосыновтың дерегінше, туризм саласының ел экономикасына қосқан үлесі 5 трлн теңгеге жеткен.

Жиын қорытындысы бойынша әкімдіктерге жағажайлардағы барлық заңбұзушылықтарды 15 маусымға дейін жою міндеттелді. Ал төрт өңірге курорттық инфрақұрылымды дамыту үшін қосымша қаржы бөлінетін болды.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Сізге қызықты болуы мүмкін

Kapital.kz-ті оқыңыз