Елорда мәслихаты LRT жүйесін «Тарлан Астана» деп өзгертуді қолдады
LRT ұзақ уақыт бойы сыбайлас жемқорлыққа байланыстырылған жоба жоба ретінде қабылданған, деді депутат
Астана қаласының мәслихаты елорданың жеңіл рельсті көлік жүйесінің атауын өзгерту туралы ұсынысты мақұлдады, деп хабарлайды Kapital.kz іскерлік ақпарат орталығының тілшісі.
Елордалық мәслихаттың кезектен тыс сессиясында «Астана қаласының Тілдерді дамыту және мұрағат ісі басқармасы» басшысының міндетін атқарушы Досжан Исабек жеңіл рельсті көлік жүйесіне жаңа атау беруді ұсынды. Оның айтуынша, мұндай бастама қала тұрғындары мен қоғамдық ұйымдар тарапынан түскен.
«Қала әкімдігіне тұрғындардан, қоғамдық ұйымдардан және Қазақстан Жазушылар одағының Астана қалалық филиалынан елордада жуырда ашылған жеңіл рельсті көлік жүйесіне атау беру туралы ұсыныстар келіп түсті. Аталған көлік жүйесі қазіргі таңда қаланың басты қоғамдық көлік желілерінің біріне айналуда. Сондықтан бұл жобаны тек LRT деген инженерлік-техникалық атаумен шектемей, қала тұрғындарына жеңіл айтылатын, есте сақталатын әрі заманауи жеке атау беру қажет деген пайым бар», – деді баяндамашы.
Оның айтуынша, қазіргі таңда қолданыстағы LRT атауы күнделікті өмірде мазмұндық әрі мақсаттық мәнге ие емес.
«Халықаралық тәжірибеде ірі көлік жүйелеріне қала тіліне, мәдениеті мен келбетіне бейімделген қысқа әрі дербес атаулар беру жиі кездеседі. Мысал ретінде, Ванкувердегі SkyTrain, Рио-де-Жанейродағы SuperVia, Ресейдегі Сапсан немесе Өзбекстандағы Афрасиаб жүйелерін атауға болады. Аталған атаулар көлік жүйесінің техникалық сипаттамасынан бөлек, қала мен елдің өзіндік ерекшелігін танытатын брендке айналған», – деп қосты басқарма өкілі.
Досжан Исабектің сөзінше, жаңа атаулар қалалық ономастика комиссиясының отырысында жан-жақты қаралған. Онда заманауи халықаралық форматқа және ұлттық болмысқа сай келетін, мобильді қосымшалар мен навигациялық карталарда қолдануға ыңғайлы нұсқалар іріктелді.
«Отырыс барысында комиссия мүшелері бірнеше нұсқаны қарастырды. Оның ішінде Сұңқар, Алпамыс, Құлан, Аспан, Тарлан және тағы басқа атаулар болды. Қорытындылай келе комиссия мүшелері Астана LRT жеңіл рельсті көлік жүйесіне «Тарлан Астана» атауын беру туралы ұсынысты бір ауыздан қолдады. Бұл атаудың айтылуы жеңіл, есте сақталуы оңай және ол заманауи көлік жүйесінің динамикасын білдіреді. Сонымен қатар халықаралық форматқа бейімделгендіктен, туристер мен шетелдік қонақтарға да түсінікті әрі қолайлы», – деді ол.
Жүйенің атын ауыстыру туралы ұсынысты депутат Бауыржан Смайылов та қолдады. Ол LRT-ның бұрынғы имиджі мен қазіргі жай-күйіне тоқталып өтті.
«LRT ұзақ уақыт бойы сыбайлас жемқорлықпен байланыстырылған жоба ретінде қабылданып келді. Алайда Президенттің тікелей тапсырмасын орындау барысында қала әкімдігі бұл жобаны іске қосты. Осы нәтижелі де табанды жұмыстың арқасында жоба сәтті жүзеге асып, бүгінде қаламыздың көрікті ерекшеліктерінің біріне айналды. Сондықтан мен бұл ұсынысты толық қолдаймын. «Тарлан Астана» деген ат бұл жобаға өте лайықты», – деді депутат.
Еске сала кетейік, бұған дейін Мемлекет басшысы Қасым-Жомарт Тоқаев Astana LRT желісін іске қосқан болатын. Желі ашылғаннан кейін екі аптадан соң Астана әкімі Жеңіс Қасымбек жеңіл рельсті көліктің жолаушылар ағыны 1 миллион адамнан асқанын мәлімдеген еді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
