Парламент Халық Кеңесін құру туралы заң жобасын мақұлдады
Жаңа конституциялық орган қоғам мен мемлекет арасындағы диалог алаңына айналуға тиіс
Парламент палаталарының бірлескен отырысында депутаттар «Қазақстан Халық Кеңесі туралы» конституциялық заң жобасын қабылдады. Құжат қоғамдық өзара іс-қимылдың жоғары өкілді органы ретінде бекіту ұсынылып отырған жаңа консультативтік институтты құруды көздейді, деп хабарлайды Kapital.kz іскерлік ақпарат орталығының тілшісі.
Заң жобасын депутат Ерлан Саиров таныстырды. Оның айтуынша, Қазақстан Халық Кеңесі азаматтық қоғамның елдің ішкі саясатындағы түйткілді мәселелерді талқылауға қатысу механизміне айналуы тиіс.
Бастамаға сәйкес, Халық Кеңесі мемлекеттік дамудың стратегиялық бағыттары бойынша ұсыныстар әзірлеу, Құрылтайға заңнамалық бастамалар енгізу, сондай-ақ республикалық референдумдар өткізу туралы ұсыныс тастау құқығына ие болады. Құрылымның басты міндеттерінің бірі ретінде билік пен қоғам арасындағы тұрақты диалогты қамтамасыз ету аталады.
Кеңес құрамы паритеттік негізде қалыптасады деп болжанып отыр. Оның құрамына ұлттық-мәдени бірлестіктердің, қоғамдық ұйымдардың, өңірлік мәслихаттар мен қоғамдық кеңестердің өкілдері кіреді.
«Халық Кеңесі жылына кемінде бір рет шақырылатын сессиядан және президиумнан тұратын болады. Бұдан бөлек, комитеттер, комиссиялар мен жұмыс топтарын құру мүмкіндігі қарастырылған. Халық Кеңесінің құрамын қалыптастыру тәртібі, оның мүшелеріне қойылатын талаптар, олардың құқықтары мен міндеттері, сондай-ақ Кеңес мүшелерінің өкілеттіктерін тоқтату механизмдері бөлек регламенттеледі», — деді депутат парламент палаталарының бірлескен отырысы барысында.
Заң жобасының мәтінінде Халық Кеңесін қалыптастыру тәртібін, кандидаттарға қойылатын талаптарды, олардың өкілеттіктерінің тізбесін, сондай-ақ құрылымдағы мүшелікті мерзімінен бұрын тоқтатуға негіз болатын жайттарды айқындайтын нормалар бөлек бекітілген.
Еске сала кетейік, Қазақстан Халық Кеңесі туралы Конституциялық заң жобасы 6 мамырда мәжілістің жұмысына қабылданған болатын.
Биылғы жылдың қаңтар айында Ұлттық құрылтайдың V отырысында мемлекет басшысы Қасым-Жомарт Тоқаев Қазақстан халқы Ассамблеясы мен Ұлттық құрылтайдың орнын жаңа ұйым: Қазақстанның Халық Кеңесі басатынын мәлімдеді. Оның құрамына 126 адам кіреді. Бұл өзгерістер 2026 жылғы 15 наурыздағы референдумда дауыс берушілердің 87,15%-ы тарапынан қолдау тапқан Қазақстанның жаңа Конституциясында көрініс тапқан.
Жаңа Конституция ресми түрде 1 шілдеде күшіне енеді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
