• Басты бет
• Государство
• Чехия қазақстандық мұнайдың ұзақ мерзімді жеткізіліміне мүдделі

Чехия қазақстандық мұнайдың ұзақ мерзімді жеткізіліміне мүдделі

Андрей Бабиш Қазақстанның әлемдегі ең ірі уран өндіруші ретінде қызығушылық тудыратынын айтты

Чехия — Қазақстанның Еуропалық Одақтағы негізгі сауда серіктестерінің бірі. Бұл туралы мемлекет басшысы Қасым-Жомарт Тоқаев Чехияның премьер-министрі Андрей Бабишпен өткен келіссөздер барысында айтты деп хабарлайды Ақорданың баспасөз қызметі.

«Тауар айналымының динамикасы көңіл көншітерліктей. Әрине, біз алдағы уақытта да сауда-экономикалық байланыстарды кеңейтуге ниеттіміз. Бүгінде елімізде 190-нан астам чех компаниясы жұмыс істеп жатыр, соның ішінде Škoda, Omnipol, Tatra және ZVVZ секілді маңдайалды кәсіпорындар мен басқа да өндіріс саласындағы сенімді әріптестеріміз бар. Бірлескен жобаларды жүзеге асыруға мүмкіндік мол», – деді Президент.

Чехия премьер-министрі өз сапарын екіжақты қарым-қатынастарды жаңа деңгейге шығарудың бастапқы нүктесі ретінде қарастыратынын атап өтті.

«Біз Қазақстанды стратегиялық серіктес санаймыз. Бірлескен күш-жігердің арқасында екіжақты тауар айналымының көлемін арттырамыз деп сенемін. Ең алдымен, энергетика саласындағы ықпалдастықты нығайтқымыз келеді. Сіздің елден ұзақ мерзімді мұнай тасымалына мүдделіміз. Энергетика саласын дамыту стратегиямыз атом энергиясына арқа сүйейді. Сондықтан Қазақстанға әлемдегі уран өндіретін ірі мемлекет ретінде де қызығушылық танытамыз», – деді Чехия Премьер-министрі.

Чехия үкіметінің басшысы Қазақстанда энергия өндіруге деген әртараптандырылған тәсілі бар энергетикалық қауіпсіздіктің берік құрылымы қалыптасқанын атап өтті. Ол чех компанияларының осы саладағы бірлескен жобаларды іске асыруға қатысуға дайын екенін растады.

Тараптар өнеркәсіп, мұнай және газ, атом энергетикасы, көлік және логистика, қорғаныс өнеркәсібі, цифрландыру, ауыл шаруашылығы және денсаулық сақтау салаларындағы өзара тиімді ынтымақтастықтың болашағын талқылады. Әңгімелесу барысында атап өтілгендей, екі елдің қарым-қатынасы ортақ тарихи жады мен мәдени-гуманитарлық байланыстарға сүйене отырып, экономика шеңберінен әлдеқайда асып түседі.

Мемлекет басшысы қазақ даласына Пржевальский жылқысын реинтродукциялау бойынша бірегей жобаны жүзеге асыруға көрсеткен қолдауы үшін чех тарапына ерекше алғысын білдірді. Бұл бастаманы президент Өңірлік экологиялық саммит барысында еліміздің биоалуантүрлілікті сақтау саласындағы жетістіктерінің бірі ретінде таныстырған болатын.

Премьер-министр Чехияның Қазақстан азаматтары үшін визалық режимді жеңілдету мәселесіне екіжақты форматта да, ЕО шеңберінде де қолдау көрсету ниеті туралы хабарлады.

Келіссөздер қорытындысы бойынша тараптар жоғары деңгейде қол жеткізілген уағдаластықтарды практикалық тұрғыда іске асыруға арналған жобалар тізімін дайындайды.

Андрей Бабиш Қасым-Жомарт Тоқаевты өзіне ыңғайлы уақытта Чехияға сапармен келуге шақырды. Мемлекет басшысы бұл ұсынысты ықыласпен қабыл алды.

Бұған дейін Қазақстан президенті мен Чехия премьер-министрі шағын құрамда кездесу өткізген еді. 2026 жылғы 28 сәуірде Қазақстан Республикасының Премьер-министрі Олжас Бектенов пен Чех Республикасының Премьер-министрі Андрей Бабиш Астанада «Қазақстан – Чехия» бизнес-форумына қатысты. Форум қорытындысы бойынша Қазақстан мен Чехия компаниялары арасында ынтымақтастық туралы алты меморандумға қол қойылды. Энергетика, көлік, машина жасау, сақтандыру және т.б. салаларда бірлескен кәсіпорындар құру қарастырылған.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Сізге қызықты болуы мүмкін

Kapital.kz-ті оқыңыз