- Басты бет
- Государство
- Алматыда стратегиялық нысандардың құрылысы тексерілді
Алматыда стратегиялық нысандардың құрылысы тексерілді
Темір жолдарды жаңғырту және жаңа нысандарды іске қосу Қазақстанның транзиттік әлеуетін нығайтады
Көлік министрлігі Алматыдағы негізгі транзиттік-логистикалық жобаларды тексерді. Ұлттық темір жол компаниясы мен мердігер ұйымдардың өкілдері Алтынөл – Жетіген учаскесін жаңғырту және Алматы станциясын айналып өтетін айналма темір жол желісін салу жобалары бойынша құрылыс-монтаждау жұмыстарының барысы туралы баяндады, деп хабарлайды министрліктің баспасөз қызметі.
Ұзындығы 293 шақырымды құрайтын «Алтынкөл – Жетіген» жобасы бойынша негізгі құрылыс жұмыстары аяқталды. Микропроцессорлық орталықтандыру жүйелерін енгізу учаскенің өткізу қабілетін тәулігіне 18-ден 33 жұп пойызға дейін арттыруға, сондай-ақ қозғалысты басқарудың қауіпсіздігі мен тиімділігін арттыруға мүмкіндік берді.
Алматы станциясының ұзындығы 74,5 шақырым болатын айналма желісінің құрылысы бойынша 2025 жылғы желтоқсанда пойыздардың жұмыс қозғалысы іске қосылды. Іске қосылған сәттен бастап желі арқылы 150 мың тоннадан астам жүк тасымалданды.
Жобаны іске асыру Алматы торабына түсетін жүктемені 40%-ға төмендетуге және жүктерді жеткізу мерзімін бір тәулікке дейін қысқартуға мүмкіндік берді. Қазіргі уақытта жер жұмыстары аяқталды, 113,1 шақырым негізгі және станциялық жолдар төселді, 18 көпір монтаждалды. Нысан пайдалануға берілгеннен кейін 306-дан астам тұрақты жұмыс орны құрылады.
Сондай-ақ Zhetysu терминалына бару барысында жобаның іске асырылу барысы туралы баяндамалар тыңдалды. Терминалды «Кедентранссервис» АҚ және Xi’an Free Trade Port қатысуымен Kazakh-Chinese Trade and Logistics Company (Almaty) Ltd. бірлескен кәсіпорны іске асыруда. Терминалдың қуаттылығы жылына 115 мың ЖФЭ құрайды. Негізгі инфрақұрылым құрылысы аяқталды, TOS жүйесі енгізілді, қайта тиеу техникасы жеткізілді және уақытша сақтау қоймасы мәртебесі алынды. Терминалды пайдалануға беру 2026 жылдың мамыр айына жоспарланған. Жобаны іске асыру транзиттік әлеуетті арттыруға және Қазақстанның негізгі логистикалық хаб ретіндегі ұстанымын нығайтуға мүмкіндік береді.
Алматы-1 вокзалының құрылысын тексеру кезінде мердігер ұйымдар мен жауапты қызметтердің баяндамалары тыңдалды. Жобада вокзал ғимаратын қолданыстағы 17 165,5 шаршы метр алаңын сақтай отырып реконструкциялау қарастырылған. Нысан заманауи инженерлік жүйелермен, күту аймақтарымен, сервистік инфрақұрылыммен және мүмкіндігі шектеулі азаматтарға арналған жағдайлармен жабдықталады. Қазіргі уақытта шатырды орнату, ғимарат қаңқасын күшейту, сыртқы инженерлік желілерді тарту және ішкі әрлеу жұмыстары жүргізілуде.
Сапар мен кеңес қорытындысы бойынша жобаларды іске асыру мерзімдерінің сақталуын қамтамасыз ету және жұмыс қарқынын арттыру тапсырылды. Сондай-ақ үкіметтің транзиттік тасымал көлемін 2026 жылдың өзінде-ақ 55 млн тоннаға жеткізу жөніндегі тапсырмасын мүлтіксіз орындау бойынша шаралар қабылдау жүктелді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
