Үкімет жаңа Конституцияны түсіндіру жоспарын бекітті

Қазақстан Республикасының Үкіметі 2026 жылғы 15 наурызда өткен республикалық референдумда қабылданған Қазақстан Республикасының Конституциясын түсіндіру жөніндегі іс-шаралар жоспарын бекітті, деп хабарлайды Kapital.kz іскерлік ақпарат орталығы премьер-министрдің баспасөз қызметіне сілтеме жасап.

Тиісті қаулыға премьер-министр Олжас Бектенов қол қойды.

Құжат Конституцияның негізгі ережелерін түсіндіру бойынша жүйелі жұмысты ұйымдастыруға, азаматтардың құқықтық сауаттылығын арттыруға және Ата заңнан туындайтын заңнамалық шараларды іске асыруға бағытталған.

Жоспар ұйымдастырушылық шаралар, ақпараттық-түсіндіру жұмыстары және Конституцияны іске асыруды құқықтық қамтамасыз ету секілді үш бағыт бойынша 36 іс-шараны қамтиды.

Атап айтқанда, ұйымдастырушылық шаралар аясында Конституция мәтінін басып шығару және тарату, оның ішінде мүмкіндігі шектеулі азаматтарға арналған бейімделген форматтарда әзірлеу, сондай-ақ электрондық платформаларда орналастыру қарастырылған. Сонымен қатар ғылыми-сараптамалық сүйемелдеу, ақпараттық-визуалдық безендіру, тақырыптық өнім шығару, көрмелік және ағартушылық жобаларды іске асыру жоспарланған.

Азаматтардың құқықтық мәдениетін қалыптастыруға және құқықтық сауаттылығын арттыруға ерекше назар аударылған. Жоспарға оқыту семинарларын және білім беру іс-шараларын өткізу, мектептер мен жоғары оқу орындарының бағдарламаларын жаңарту, «Конституция негіздері» және «Заң және тәртіп» пәндерін әзірлеу, әдістемелік материалдар мен балаларға арналған басылымдар шығару енгізілген.

Ақпараттық-түсіндіру жұмыстары аясында іс-шаралар күнтізбесі мен кешенді медиажоспар қалыптастырылады.

Сондай-ақ Конституцияны іске асыруды құқықтық қамтамасыз ету бойынша шаралар қарастырылған. Оған заңнамалық бастамаларды жүзеге асыру, қолданыстағы заңнаманы талдау және Негізгі заң ережелерін ескере отырып стратегиялар мен тұжырымдамаларды жаңарту кіреді.

Жалпы, жоспар Конституция нормаларын халық арасында кеңінен түсіндіруге және Ата заңның ережелерін толыққанды іске асыруға мүмкіндік береді.

Еске сала кетейік, 2026 жылғы 15 наурызда Қазақстанда жаңа Конституция бойынша жалпыұлттық референдум өтті. Оның қорытындысы бойынша дауыс бергендердің 87,15%-ы Ата заңға енгізілген өзгерістерді қолдады. Конституцияның жаңа редакциясы 1 шілдеден бастап күшіне енеді.