Астанада жаңа тартымды қоғамдық кеңістіктер пайда болады

Астана әкімі Жеңіс Қасымбек Instagram парақшасында халықтың серуендеуіне арналған қандай жаңа орындар пайда болатыны туралы жазды. Елорда әкімдігінің ресми сайтының хабарлауынша, соңғы жылдары Астанада шамамен 500 қоғамдық және аула кеңістігі абаттандырылған. Абаттандыру барысында көгалдандыруға ерекше назар аударылады.

Әкімнің айтуынша, «Мыңжылдық» аллеясында бірден үш маңызды кеңістік бойынша жұмыстар басталады: Қуанышбаев атындағы театр алдындағы сквер, вокзал маңы саябағы және Нұрлы жол вокзалы аумағы. Бұл ұзындығы 4 шақырымнан асатын ірі желілік саябақты қалыптастырудың алғашқы кезеңі болмақ. Болашақта ол қаланың негізгі нүктелерін біртұтас жаяу жүргінші осіне біріктіреді.

«Сонымен қатар, Төле би көшесінен Әнет баба көшесіне дейін, Күлтегін көшесінен Айтматов көшесіне дейінгі Greenline жаяу жүргіншілер бульварының (2-кезек) абаттандыру жұмыстары жалғасады. Мұнда ойын және спорт аймақтары, тоғандар жүйесі және басқа да нысандар салынады. Сондай-ақ Қалдаяқов, Кенесары көшелері мен Мәңгілік Ел, Қабанбай батыр, Момышұлы және Ұлы Дала даңғылдары да жаңартылады. Негізгі назар жаяу жүргіншілерге арналған кедергісіз орта, көгалдандыру және сапалы қоғамдық кеңістіктер қалыптастыруға аударылады», – деп жазды Жеңіс Қасымбек.

Сонымен қатар, Есіл өзені бойымен үздіксіз жаяу жүргінші маршрутын қалыптастыру жұмыстары жалғасуда. «Бейбітшілік және келісім» саябағын жаңа Конгресс-орталық бағытына қарай (2-кезек) абаттандыру, сондай-ақ «Городской романс» саябағын (2-кезек) дамыту жоспарланған. Бұдан бөлек, Кіші Талдыкөл аумағында экосаябақты абаттандыру жұмыстары басталады.

«Сондай-ақ «Тұлпар» сауда үйі маңындағы, №119 мектеп жанындағы, Пушкин көшесіндегі, Сәтбаев көшесі мен Момышұлы даңғылы қиылысындағы скверлер абаттандырылады. Сонымен қатар Момышұлы даңғылы, Құдайбердіұлы көшесі, Қошқарбаев даңғылы және басқа да аумақтар қамтылады. Жұмыстар елорданың барлық ауданында жүргізіледі», – деді әкім.