Президент жоғары білім сапасын арттыруға бағытталған тапсырмалар берді

Мемлекет басшысы Саясат Нұрбекті қабылдады, деп хабарлайды Kapital.kz іскерлік ақпарат орталығы Ақорданың баспасөз қызметіне сілтеме жасап.

Президентке ведомство қызметінің басым бағыттары мен ғылым және жоғары білім саласындағы стратегиялық бастамалардың іске асырылу барысы туралы баяндалды. Саясат Нұрбек:

* жоғары білім мен ғылым саласында жаңа Конституцияның әлеуетін іске асыру туралы ақпарат берді;

* адам капиталын дамыту экожүйесін қалыптастыру және таланттарды басқарудың бірыңғай жүйесін іске қосу жөніндегі шараларды ұсынды;

* еңбек нарығын зерттеу нәтижелері мен 2030 жылға дейінгі кадрларға деген қажеттілік болжамы туралы есеп берді;

* «Келешек» механизмін енгізуді және саланы қаржыландырудың жаңа моделін қамтитын жоғары білімге қолжетімділікті кеңейту шараларын айтты;

* AI-Sana ұлттық қозғалысын жүзеге асыру, сондай-ақ білім беру және өндірістік процестерге жасанды интеллектіні енгізетін жаңа буын индустриялық университет — AI-Enabled University жобасын іске қосу, сонымен қатар инновациялық кластерлер мен ғылыми қалашықтарды қоса алғанда, ғылымды қажетсінетін аумақтарды құру жоспарлары туралы баяндады;

* DeepTech және күрделі өндірістерді дамыту моделіне жүйелі көшу жүзеге асырылып жатқанын жеткізді.

Негізгі тетіктердің бірі – жоғары оқу орындарының өңірлік әкімдіктермен өзара іс-қимылы. Бұл технологиялық міндеттер мен перспективалы бағыттарды айқындауға мүмкіндік береді. Механизм ғылыми-зерттеу және тәжірибелік-конструкторлық жұмыстарды жүргізуді, өнеркәсіптік үлгілер жасауды және өндірісті іске қосуды қамтиды.

Ғылыми саясатты жетілдіруге бағытталған реформаларды іске асыру жалғасуда. Салаға жауапты ведомство ғалымдарды мемлекеттік қолдауға, атап айтқанда, гранттар беру, ғылыми тағылымдамалар, сыйақылар, сондай-ақ жас ғалымдарды тұрғын үймен қамтамасыз етуге ерекше назар аударып отыр.

Мемлекет басшысы жоғары білім сапасын арттыруға, ғылыми зерттеулерді дамыту мен коммерцияландыруға, инновациялық қызметті ынталандыруға, инфрақұрылымды дамытуға, сондай-ақ шетелдік университеттердің филиалдарының сапасын көтеруге бағытталған бірқатар тапсырма берді.

Еске салайық, бұған дейін вице-премьер – мәдениет және ақпарат министрі Аида Балаева технологиялық өзгерістер жағдайында білім беру жүйесі мен кадр даярлауды трансформациялау жұмыстары туралы айтқан болатын. Ол 700-ден астам білім беру бағдарламасын жабу, жаңа бағыттарды іске қосу және тәжірибеге бағытталған оқытуға көшу жоспарлары бар екенін мәлімдеді.

Әл Фараби атындағы Қазақ ұлттық университетінде ғылыми қауымдастықпен кездесу барысында президент Қазақстан ғылым, технология, техника және өндірістік үдерістер бағытына қарай дамуы тиіс екенін атап өтті.