Қазақстанда 270 емшара кабинеті жабылды

Денсаулық сақтау министрлігі жеке емханаларға бақылауды күшейтті. Жаппай тексерістен кейін 270 жеке емшара кабинеті өз қызметін тоқтатып, заң бұзған нысандарға 16 миллион теңгеден астам айыппұл салынды, деп хабарлайды Kapital.kz іскерлік ақпарат орталығы.

Денсаулық сақтау министрлігі республика бойынша 1900 нысанды мониторингтен өткізіп, оның 408-і тиісті лицензиясыз жұмыс істеп келгенін анықтады. Қазіргі таңда тағы 116 нысанға қатысты жоспардан тыс тексеру жүріп жатыр.

Тексеруді Медициналық және фармацевтикалық бақылау комитеті жүргізген. Нәтижесінде бірқатар заңбұзушылықтар анықталып, кейбір кабинеттер өз қызметін тоқтатуға мәжбүр болған.

Атап айтқанда, 270 емшара кабинеті қызметін ерікті түрде жапқан. Сонымен қатар бірқатар кәсіпкерлер қызметін заңдастыру үшін рұқсат құжаттарын рәсімдеуге кіріскен.

Мониторинг барысында келесі жүйелі бұзушылықтар тіркелген:

• медициналық қызметті лицензиясыз жүргізу;

• санитариялық талаптарды сақтамау;

• дәрілік заттарды сақтау ережелерін бұзу;

• білікті медициналық персоналдың болмауы;

• шұғыл көмек көрсетуге қажетті жабдықтардың жоқтығы.

Бақылау нәтижесінде 147 әкімшілік хаттама толтырылып, жалпы сомасы 16 млн теңгеден астам айыппұл салынған.

Ведомство жүргізіліп жатқан шаралар пациенттердің қауіпсіздігін қамтамасыз етуге және медициналық қызмет сапасын арттыруға бағытталғанын атап өтті.