Қазақстанда ителгінің популяциясы қалпына келтірілуде
Жетісу облысында Қызыл кітапқа енген құс табиғи ортаға жіберілді
2026 жылғы 29 наурызда «Алтын Емел» ұлттық табиғи паркінің аумағында ителгіні табиғи тіршілік ортасына жіберу бойынша экологиялық іс-шара өтті. Бұл туралы экология және табиғи ресурстар министрлігі хабарлады. Ведомствоның мәліметінше, бұл шаралар 2026-2028 жылдарға арналған «Қазақстанның оңтүстік-шығысында ителгі популяциясын қалпына келтіру» жобасы аясында жүзеге асырылуда.
Жобаның негізгі мақсаты – Қазақстанның Қызыл кітабына енгізілген сирек түрдің санын қалпына келтіру, сондай-ақ биоалуантүрлілікті сақтау және экологиялық тепе-теңдікті қамтамасыз ету.
«Іс-шара бағдарламасына құстарды ұшыру рәсімі, экологиялық дәрістер, парк аумағына экскурсиялар, сондай-ақ құстарды бақылау және мониторинг әдістерін көрсету сияқты танымдық белсенділіктер енгізілген. Іс-шараға Жетісу облыстық аумақтық инспекциясының, Зоология институтының, «Сұңқар» тәлімбағының, «Алтын Емел» МҰТП-ның, сондай-ақ Жетісу облысының ветеринариялық қызметінің өкілдері қатысты. Қонақтар қатарында Сауд Арабиясынан келген өкілдер де болды», – делінген хабарламада.
Министрлік жобаны іске асыру ителгінің санын арттыруға, өңір экожүйесін нығайтуға және қоғамның қоршаған ортаны қорғау мәселелеріне қызығушылығын арттыруға мүмкіндік беретінін атап өтті.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
