Степногорскіде 1,5 мың гектардан астам жер мемлекет меншігіне қайтарылды

Степногорскіде мемлекетке 1,5 мың гектардан астам жер учаскелері қайтарылды, деп хабарлайды Kapital.kz іскерлік ақпарат орталығы Ақмола облысы прокуратурасының баспасөз қызметіне сілтеме жасап.

«Прокурорлық қадағалау шараларының нәтижесінде Степногорск прокуратурасы кадастрлық құны 52 млн теңге болатын жалпы ауданы 1 500 гектардан асатын жер учаскелерін мемлекет меншігіне қайтарды. Тексеру барысында жергілікті атқарушы органның лауазымды тұлғалары тарапынан жер заңнамасының өрескел бұзушылықтары анықталды, оның ішінде жер учаскелерін сауда-саттықсыз беру, конкурстық рәсімдерді сақтамау, мақсатсыз пайдалану және жерді өз бетінше иелену фактілері бар», – деп хабарлады қадағалау органы.

Сондай-ақ қала әкімдігі тарапынан жерлерді ұтымды әрі мақсатты пайдалану бойынша мемлекеттік бақылау іс жүзінде жүргізілмегені анықталды.

Прокуратураның талабы бойынша Жер ресурстарын басқару департаменті заң бұзушылықпен пайдаланылған жер учаскелерін қайтару туралы екі талап-арыз берді.

Прокурорлық қадағалау актісі негізінде жер қатынастарына жетекшілік ететін әкім орынбасары тәртіптік жауапкершілікке тартылды.

Бұған дейін Қонаев қаласында зообағы бар кешен үшін берілген жер учаскесінің мемлекет меншігіне қайтарылғаны хабарланған болатын.

Сондай-ақ экс-мемлекеттік корпорация қызметкері 13,6 млрд теңгеге бағаланатын жер учаскелерін иемденгені белгілі болды. Түркістан облысында 2,9 мың гектардан астам ауыл шаруашылығы жері мемлекетке қайтарылды. Жамбыл облысында ауыл шаруашылығы жерлерінің мақсатсыз пайдаланылғаны анықталып, жайылымдар жыртылып, егістікке пайдаланылған. 2025 жылы олигополиялардың иелігіндегі 800 мың гектар жер мемлекет меншігіне қайтарылды.