Freedom Holding Corp. акцияларын АҚШ-тан тыс жерлерде орналастыруды жоспарлап отыр

Freedom Holding Corp. компаниясы өз акцияларының бір бөлігін қазақстандық және АҚШ алаңдарын қоспағанда, өзге де шетелдік биржаларда орналастыруды жоспарлап отыр. Бұл туралы холдинг басшысы Тимур Турлов Астанада өткен Freedom Inside '26 конференциясында мәлімдеді, деп хабарлайды Kapital.kz іскерлік ақпарат орталығының тілшісі.

«Қазір біз акцияларымызды биржаларда ішінара орналастыру мүмкіндігін қарастырып отырмыз. Бұл орналастырудан Freedom да, біздің инвесторлар да ұтады. Бірақ түпкілікті шешім қабылдамас бұрын әлеуетті инвесторлардың пікірін білгіміз келеді. Ертең, 10 сәуірден бастап акцияларды сатып алуға алдын ала өтінімдерді жинауға кірісеміз», – деді Тимур Турлов.

Акцияларды сатып алуға өтінімдерді Freedom Finance Global PLC және холдингтің мобильді қосымшасы арқылы беруге болады.

«Түскен өтінімдердің көлемі біз үшін маңызды көрсеткіш болады», – деп атап өтті кәсіпкер.

Ол холдинг акцияларын қандай алаңдарда орналастыру жоспарланып отырғанын да айтты.

«Бас компаниямыздың бағалы қағаздары америкалық Nasdaq биржасында айналымда болғандықтан, біз бағалы қағаздарды орналастыру және инвесторларды тарту бойынша қатаң талаптарды ұстанамыз. Реттеушілік талаптарға сәйкес акцияларды АҚШ-тан тыс жерде орналастыру жоспарланып отыр, бұл қағаздарды аталған елдің резиденттері сатып ала алмайды. Біз орналастыруды Қазақстанда және басқа да бірқатар юрисдикцияларда жүзеге асырамыз», – деді Тимур Турлов.

Сөз барысында ол тартылатын инвестицияларды холдинг қандай мақсаттарға бағыттайтынын да түсіндірді.

«Бизнесіміздің өсуі бізден қосымша капитал тартуды талап етеді. Әрбір келесі банктік мәміле немесе лицензия алу жүздеген миллион долларды қажет етеді», – деді холдинг басшысы.

Айта кетейік, холдинг біртіндеп шетел нарықтарына шығуды жалғастырып келеді. Соның бірі ретінде түркиялық банкті сатып алу жоспарын атауға болады. Бұл туралы 2025 жылдың желтоқсанында белгілі болды.

2026 жылдың наурызында Freedom Holding Corp. Түркиядағы TurkishBank Group еншілес компаниясының бақылау пакет акцияларын реттеуші органдардың рұқсатын алғаннан кейін сатып алуды жоспарлап отырғаны хабарланды.

Түркиялық Turkiye Today басылымының жазуынша, Ozyol Holding пен Кувейттің Ұлттық банкі (NBK) түрік тарапындағы негізгі акционерлер өз үлестерін беруге келісім берген. Бұл үлес банк капиталының 99,31%-ын құрайды және ол Freedom Holding-тің Түркиядағы еншілес компаниясы Freedom Finansal Hizmetler AS-қа өтпек.

Freedom Holding Corp. негізін 2008 жылы кәсіпкер Тимур Турлов құрған. Алғашында АҚШ қор нарықтарына қолжетімділік ұсынуға маманданған компания кейін Алматыда бас кеңсесі орналасқан халықаралық қаржылық экожүйеге айналды.

Холдинг АҚШ-та құрылған. Оның еншілес компаниялары бағалы қағаздармен брокерлік операциялар жүргізеді, маркетмейкинг қызметтерін көрсетеді, инвестициялық-банктік қызметтер, сондай-ақ сақтандыру және төлем өнімдерін ұсынады. Сонымен қатар холдингтің телеком және медиа бизнесі бар. Топтың қызметі Қазақстанды қоса алғанда Кипр, АҚШ, Ұлыбритания, Армения, БАӘ, Өзбекстан, Қырғызстан, Тәжікстан, Әзербайжан және Түркия елдерін қамтиды. Холдингтің Аустрия, Бельгия, Болгария, Франция, Германия, Грекия, Италия, Литва, Нидерланд, Польша және Испанияда да өкілдіктері бар.

Холдингтің жай акциялары Nasdaq, KASE және AIX биржаларында саудаланады.