Еуразиялық қаржы компаниясы активтеріндегі Александр Машкевичтің үлесін кім мұраға алады
Қаржы реттеушісі Еуразиялық банк пен «Еуразийский Капитал» брокерлік компаниясының жаңа қатысушыларын келісімнен өткізді
Eurasian Resources Group тең иеленушісі Александр Машкевичтің жұбайы мен екі қызына «Еуразиялық қаржы компаниясы» активтерінде ірі (жанама) қатысушылар мәртебесін иеленуге келісім берілді, деп хабарлайды Kapital.kz іскерлік ақпарат орталығы қаржы нарығын реттеу және дамыту агенттігіне сілтеме жасап.
Хабарланғандай, қаржы реттеушісінің басқармасы қабылдаған үш қаулыға сәйкес Алла Машкевич (жесірі), Анна Машкевич (қызы) және Лариса Машкевич (қызы) «Еуразиялық банк» АҚ-ына қатысуға келісім алды. Сонымен қатар олардың «Еуразийский Капитал» АҚ брокерлік компаниясына қатысуы да мақұлданды.
Еске салайық, олигарх Александр Машкевич 2025 жылдың наурыз айында 72 жасында қайтыс болды. Кәсіпкер «Еуразиялық қаржы компаниясы» акцияларының 33%-ына иелік еткен. Бұл компания «Еуразиялық банкке», «Еуразийский Капитал» брокерлік компаниясына, «Евразия» сақтандыру компаниясына иелік етеді және ERG құрамында үлесі бар.
Биылғы жылдың ақпан айында марқұм кәсіпкер Александр Машкевичтің Еуразиялық өнеркәсіптік компаниядағы үлесі жаңа акционер – Дубайда тіркелген Central Asian DMCC компаниясына өткендігі хабарланған болатын.
Сондай-ақ 2025 жылдың қазан-қараша айларында Александр Машкевичтің Қазақстандағы үш компаниядағы үлесі дәл осы Central Asian DMCC компаниясына берілді. Атап айтқанда, «Еуразиялық өндірістік компания», «Еуразиялық коллекторлық агенттік» және «Kazakhstan Mineral Resources Corporation Investment» активтеріндегі үлестер туралы сөз болып отыр.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
