«МЭКС» ұлттық жобасы: Қазақстанның Даму Банкі Жетісу облысының электр желілерін жаңғыртуды қаржыландырады

«Қазақстанның Даму Банкі» АҚ («Бәйтерек» ҰӘҚ» АҚ еншілес құрылымы) мен «Талдықорған акционерлік көлік-электржелілік компаниясы» АҚ Жетісу облысының электр желілерін жаңғырту үшін 9,16 млрд теңге сомасында кредиттік желі ашу туралы келісімге қол қойды.

Қаражат «Энергетикалық және коммуналдық секторларды жаңғырту» ұлттық жобасы аясында инфрақұрылымдық жобалар кешенін іске асыруға бағытталады.

Қаржыландыру Жетісу облысының елді мекендеріндегі, соның ішінде Талдықорған, Үштөбе және Сарқан қалаларында, сондай-ақ Көксу, Қаратал, Ескелді, Кербұлақ және Ақсу аудандарында электр желілік инфрақұрылымды реконструкциялау мен жаңғыртуды қамтиды.

Жоба аясында әртүрлі кернеудегі 465 шақырымнан астам электр беру желілерін жаңарту, кабель желілерін модернизациялау, сондай-ақ екі негізгі қосалқы станцияны қайта жаңғырту жоспарланған.

«Энергетикалық инфрақұрылымды жаңғырту – өңірлердің тұрақты экономикалық өсуінің негізі. Мұндай жобаларды қолдау электрмен жабдықтаудың сенімділігін арттырып қана қоймай, инвестициялар тартуға және бизнесті дамытуға жағдай жасайды», – деп атап өтті «Қазақстанның Даму Банкі» АҚ басқарма төрағасы Марат Елібаев.

Жобаны іске асыру электрмен жабдықтаудың сенімділігін арттыруға, технологиялық шығындарды азайтуға, сондай-ақ өңірдің әлеуметтік-экономикалық дамуына жағдай жасауға мүмкіндік береді. Инфрақұрылымды жаңарту халықтың өмір сүру сапасын жақсартып, бизнес пен әлеуметтік нысандарды тұрақты энергиямен қамтамасыз етуге ықпал етеді.

Қазақстанның Даму Банкі үшін бұл – «МЭКС» ұлттық жобасы аясында қолдау көрсетілген табиғи монополия субъектілерінің екіншісі. Жоба жалпы саны 1,5 млн-нан астам халқы бар өңірлерді электр желілерімен қамтуды қамтамасыз етеді.

Құрылыс жұмыстарын аяқтау және нысандарды толық пайдалануға беру 2027 жылғы қаңтарға жоспарланған.