Қазақстанда жаңа шетелдік банк пайда болады

Қазақстанда «Abu Dhabi Commercial Bank (Kazakhstan)» акционерлік қоғамының еншілес банкін құруға рұқсат берілді, деп хабарлайды Kapital.kz іскерлік ақпарат орталығы қаржы нарығын ретттеу және дамыту агенттігінің баспасөз қызметіне сілтеме жасап.

ҚР қаржы нарығын реттеу және дамыту агенттігі Abu Dhabi Commercial Bank PJSC-ке Қазақстан аумағында еншілес банк ашуға келісім берді.

Жаңа шетелдік банктің ашылуы агенттіктің банк заңнамасын ырықтандыру және елімізде сенімді шетелдік банктерді тарту мақсатында ашық әрі бәсекелестік орта қалыптастыру бағытында жүргізген реформаларының нәтижесі болып отыр.

ADCB – Біріккен Араб Әмірліктеріндегі ірі банктердің бірі. Оның негізгі акционері – Абу-Даби үкіметіне толық тиесілі Mubadala Investment Company PJSC инвестициялық компаниясы.

Банк Fitch Ratings шкаласы бойынша A+/F1/Stable халықаралық кредиттік рейтингтерге ие. 2025 жылғы 31 желтоқсандағы жағдай бойынша ADCB-ның жиынтық активтері 210 млрд АҚШ долларынан асады, меншікті капиталы – 24 млрд АҚШ долларынан жоғары, ал жылдық таза пайдасы 3 млрд АҚШ долларынан асқан.

Қазақстанда құрылатын еншілес банкке қатысты ADCB жалғыз акционер болады. Бас банк Қазақстан заңнамасына сәйкес жарғылық капиталды қалыптастырып, стратегиялық басқару мен қаржылық-операциялық қолдауды қамтамасыз етпек.

Жаңа банк клиенттерге банктік қызметтердің толық спектрін ұсынуды жоспарлауда. Сонымен қатар «ислам терезесі» тетігі арқылы исламдық қаржыландыруды дамыту көзделген.

«Қазақстан Республикасындағы банктер және банк қызметі туралы» жаңа заң талаптарына сәйкес әмбебап банк лицензиясын алу ішкі инфрақұрылым толық дайын болғаннан кейін жүзеге асырылады.

Агенттік өтініш пен құжаттар топтамасын қарау нәтижесінде 2026 жылғы 20 наурыздағы №8 қаулымен ADCB-ға еншілес банк ашуға рұқсат берді. Сонымен қатар №9 қаулымен банк холдингі мәртебесін алуға келісім, ал №10 қаулымен еншілес ұйым құруға рұқсат рәсімделді.