Алматыда 400-ден астам заңсыз сауда нүктесі жойылды
Тексеру жұмыстары қала бойынша барлық коммерциялық нысандарды, соның ішінде ірі базарлар мен «барахолка» аумағын қамтыды
Алматы әкімі Дархан Сатыбалды стихиялық саудамен күресу және дүңгіршектердің жұмысын ретке келтіру жөнінде жиын өткізді. Кездесуде 2026 жылғы мониторинг қорытындысы шығарылып, мемлекеттік және жекеменшік жерлердегі көше саудасы нүктелерін бақылаудың жаңа шаралары талқыланды, деп хабарлайды Kapital.kz іскерлік ақпарат орталығы әкімдіктің баспасөз қызметіне сілтеме жасап.
Анықталған 45 стихиялық сауда ошағында 1211 адам саудамен айналысып келген. Бүгінгі таңда 27 орын немесе олардың 60%-ы жойылды. Қалған нүктелер негізінен ірі базарлардың маңында, соның ішінде Алатау және Жетісу аудандарының «барахолка» аймағында шоғырланған. Рейдтік іс-шаралардың тек уақытша ғана нәтиже беретіні атап өтілді, сондықтан проблемалық аумақтарда тұрақты бақылауды күшейту және бұл ошақтарды жауапты бөлімшелерге бекітіп беру қажет.
Мемлекеттік жер қорында 516 сауда нысаны анықталып, оның 413-і бұзылды. Қазіргі уақытта 103 нысан бойынша жұмыстар жүргізіліп жатыр.
Халықтың нақты әлеуметтік жағдайы мен әлеуметтік жағынан осал топтар мәртебесін жеке коммерциялық мақсатта пайдалану әрекеттерін ажырата білу қажеттілігіне ерекше назар аударылды. Талаптарды бұза отырып орналастырылған және тұрғындарға кедергі келтіретін нысандар заңнамаға сәйкес келтірілуі тиіс.
Сонымен қатар жекеменшік аумақтардағы ахуал да қаралды. Мұнда 1093 нысанға мониторинг жүргізілді. Енді заңнамада көзделген процедураларды, соның ішінде жер телімдерінің нысаналы мақсатын және қала құрылысы талаптарының сақталуын тексеруді жүзеге асыру талап етіледі.
Жиын барысында заңсыз нысандардың қайта пайда болуына жедел әрекет ету мерзімін қысқарту, оларды қайта орнатқаны үшін жауапкершілікті күшейту және уәкілетті органдардың заңсыз нысандарды бұзу жөніндегі өкілеттіктерін кеңейту үшін заңнаманы жетілдіру қажеттілігі айтылды. Мемлекеттік органдарға жұмыс үйлесімділігін арттыру, заңсыз нысандарды алуды жалғастыру және олардың қайта бой көтеруіне жол бермеуді қамтамасыз ету тапсырылды.
Еске сала кетейік, Жоғары аудиторлық палата Алматының 2020 жылғы 1 қаңтар мен 2025 жылғы 17 қыркүйек аралығындағы бюджет қаражаты мен активтерін пайдалану тиімділігіне жүргізілген мемлекеттік аудитті қорытындылады. Тексеру барысында жоспарлау, басқару және бақылау жүйесіндегі кемшіліктер, сондай-ақ 203 миллиард теңгеден астам сомаға қаржылық заңбұзушылықтар анықталды, оның бір бөлігі өтелді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
