ӘКК бюджетке біреудің 544 млн теңге қарызын төлеуге мәжбүр болды
Мемлекеттік аудиттен кейін әлеуметтік-кәсіпкерлік корпорациялардың қаржылық қызметіне өзгерістер енгізілді
Қазақстанда жекеменшік компаниялар бұдан былай әлеуметтік маңызы бар азық-түлік бағасын тұрақтандыруға берілетін қарыздарды кепілдендіру үшін сақтандыру шарттарын пайдалана алмайды. Ауыл шаруашылығы министрлігінің тиісті бұйрығы күшіне енді. Бұл шараға өңірлік әлеуметтік-кәсіпкерлік корпорацияларға (ӘКК) жүргізілген мемлекеттік аудит нәтижесі себеп болды, деп хабарлайды Kapital.kz іскерлік ақпарат орталығы Жоғары аудиторлық палатаның баспасөз қызметіне сілтеме жасап.
«Тексеру барысында кейбір ӘКК-лердің ұзақ мерзімді қарыздарды қамтамасыз ету ретінде небәрі бір жылдық сақтандыру шарттарын қабылдағаны анықталды. Мұндай заңсыздық «Ақтөбе ӘКК» АҚ-да да тіркелген. Мұнда жекеменшік бір ЖШС-ге бүкіл кезеңді қамтитын кепіл құжатының жоқтығына қарамастан, 544 млн теңге несие берілген. Салдарынан компания қарызды қайтара алмай, ӘКК бюджет алдындағы міндеттемені өз мойнына алуға мәжбүр болды. Алдағы уақытта мұндай жағдайды болдырмау үшін ЖАП Ауыл шаруашылығы министрлігіне Әлеуметтік маңызы бар азық-түлік тауарларының бағасын тұрақтандыру ережесіне түзетулер енгізуді тапсырды. Нақтырақ айтқанда, қарызды қамтамасыз ету құралы ретінде сақтандыру шарттарын пайдалану мүмкіндігін толықтай алып тастау жүктелді», — делінген аудиторлық палата таратқан ақпаратта.
Бұл қадам өңірлік ӘКК-лердің қаржылық тұрақтылығын нығайтуға және әлеуметтік маңызы бар азық-түлік бағасын тұрақтандыру жұмысының тиімділігін арттыруға септігін тигізбек.
Еске сала кетейік, Жоғары аудиторлық палатаның төрағасы Әлихан Смайылов Қазақстанда квазимемлекеттік сектордың бюджетке тәуелділігі әлі де жоғары екенін мәлімдеген болатын. ЖАП-тың пайымдауынша, жүріп жатқан реформалар мен мемлекеттің экономикадағы үлесін азайту мақсатына қарамастан, өткен жылы бұл сектордың мемлекеттік қаржы жүйесіне ықпалы айтарлықтай өзгере қойған жоқ.
Бұған дейін 2026 жылы 200-ге жуық мемлекеттік нысанды бәсекелестік ортаға беру жоспарланғаны хабарланды. Мемлекеттік комиссия теңгерімдік құны 3 трлн теңгеден асатын 400-ден астам компанияны оңтайландыруды қолдады.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
