• Басты бет
• Экономика
• Жекешелендіру жоспарының орындалмауы бюджетке түсетін ауыртпалықты арттыруда — ЖАП

Жекешелендіру жоспарының орындалмауы бюджетке түсетін ауыртпалықты арттыруда — ЖАП

Квазимемлекеттік сектор мемлекет қазынасына кіріптар болып отыр

Жоғары аудиторлық палата (ЖАП) төрағасы Әлихан Смайылов Қазақстанда квазимемлекеттік сектордың бюджеттік қаржыландыруға тәуелділігі әлі де жоғары деңгейде қалып отырғанын айтты, деп хабарлайды Kapital.kz іскерлік ақпарат орталығы хабарлайды.

ЖАП бағалауынша, экономикадағы мемлекет үлесін азайту бойынша жүріп жатқан реформалар мен жарияланған мақсаттарға қарамастан, былтыр квазимемлекеттік сектордың экономика мен мемлекеттік қаржы жүйесіне ықпал ету құрылымы түбегейлі өзгере қойған жоқ.

«Жекешелендірудің кешенді жоспарын жүзеге асыру қарқыны баяулады. Бәсекелестік ортаға негізінен тек коммуналдық кәсіпорындар беріліп жатыр. Соның кесірінен кейбір жағдайларда жергілікті органдар елді мекендерді абаттандыру, көшелерді тазалау және басқа да күнделікті қажеттіліктерді жедел әрі сапалы қамтамасыз ету мүмкіндігінен айырылып қалды. Сонымен бірге, квазимемлекеттік сектордың бюджетке арқа сүйеуі үдеп барады», — деп атап өтті Әлихан Смайылов Мәжілістің жалпы отырысында.

Аудит нәтижелері жекешелендіру процесінің іс жүзінде маңызы төмен салалармен шектеліп жатқанын, ал ірі және экономикалық тұрғыдан салмақты активтердің мемлекеттік басқару жүйесінде қалып қоятынын көрсетеді. Бұл құрылымдық трансформацияның тиімділігін төмендетіп, бюджетке түсетін ауыртпалықты жоғары деңгейде сақтап тұр.

ЖАП мәліметтері бойынша, 2025 жылы квазимемлекеттік сектор субъектілеріне 812 млрд теңге бюджет қаражаты бағытталған, бұл ретте осы көлемнің 57%-ы мемлекеттік тапсырыс механизмі арқылы бөлінген. Бұл, шын мәнінде, ведомстволық бағынысты ұйымдарды тікелей қаржыландырудың тұрақты арнасына айналды.

«Мемлекеттік тапсырыстың өзі ведомстволық бағынысты ұйымдарды конкурстан тыс қаржыландыру үлгісіне айналып барады. Кейбір жағдайларда жұмыстар мен көрсетілетін қызметтердің айтарлықтай бөлігі қосалқы мердігерлерге (бірлесіп орындаушыларға) беріледі. Квазимемлекеттік сектор субъектілері мемлекеттік сатып алу аясында қосымша 1,4 трлн теңге алды», — деп толықтырды ЖАП басшысы.

Бұған дейін 2026 жылы 200-ге жуық мемлекеттік нысанды бәсекелестік ортаға беру жоспарланғаны хабарланған болатын. Мемлекеттік комиссия теңгерімдік құны 3 трлн теңгеден асатын 400-ден астам компанияны жекешелендіруді қолдады.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Сізге қызықты болуы мүмкін

Kapital.kz-ті оқыңыз