Энергетика министрі бензиннің қымбаттауына қатысты пікір білдірді
Бұдан былай бағаның өзгерісі сұраныс пен ұсынысқа байланысты болады
Мәжіліс кулуарында Энергетика министрі Ерлан Ақкенженов бензин бағасының өсуіне қатысты жағдайды түсіндірді. Ол мемлекеттік реттеуден бас тартқаннан кейін отын құнын нарықтың өзі айқындайтынын айтты, деп хабарлайды Kapital.kz іскерлік ақпарат орталығының тілшісі.
«Бізде мемлекеттік реттеу жойылған. Бағаны ішкі сұраныс пен ішкі ұсыныс белгілейді. Білуімше, жанармай 3-4 теңгеге ғана өсті. Сондықтан сіздің «10 теңгеге қымбаттады» деген уәжіңіз қате», — деді Ерлан Ақкенженов.
Министрлік басшысы жазғы кезеңде бағаның қазіргі деңгейде тұрақты сақталуына кепілдік бере алмайтынын жеткізді. Оның айтуынша, жағдайдың бұдан былайғы дамуы нарықтағы ахуалға байланысты болады, дегенмен ведомство өзгерістерді жіті қадағалап отыр.
«Тағы да қайталаймын, бәрін ішкі сұраныс пен ішкі ұсыныс шешеді. Біз нарыққа араласпаймыз. Егер нарыққа қатысушылар қазіргі жағдайда бағаны 3-4 теңгеге көтеруді қисынды деп тапса, олар осы құнды белгілейді. Нарықтық баға деген ұғым бар. Қазір бізде мұнай бағасы шарықтап тұрған жоқ, барреліне 93,5 доллар деңгейінде тұрақтады. Қазақстандықтар алаңдамаса да болады, Энергетика министрлігі жағдайды бақылауда ұстап отыр және ахуалдың ушығып кетпеуі үшін тиісті шараларды қабылдайды», — деп толықтырды министр.
Бұған дейін Қазақстанда қаңтар мен мамыр айлары аралығында 3,7 млн тонна мұнай өнімі өндірілгені хабарланған болатын. Сәуір айында Энергетика вице-министрі Қайырхан Тұтқышбаев та мемлекет бензин құнының күрт өсуіне жол бермейтінін мәлімдеген еді.
Еске сала кетейік, 2025 жылдың қазан айында Қазақстанда АИ-92 бензині мен дизель отынының құнын өсіруге мораторий енгізіліп, оның мерзімі 1 сәуірден бастап аяқталған болатын.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
