Мамыр айында электрондық еңбек биржасында кімдерге ең жоғары жалақы ұсынылды?
Өткен айда ЭЕБ-ға 86 мыңнан астам бос жұмыс орны шығарылды
Мамыр айында Enbek.kz электрондық еңбек биржасында жұмыс берушілер 86,7 мың бос жұмыс орнын орналастырса, жұмыс іздеушілер 91,6 мың түйіндеме жариялады. 2026 жылдың басынан бері платформада 495,7 мың бос жұмыс орны мен 609,3 мың түйіндеме ұсынылған, деп хабарлайды Kapital.kz іскерлік ақпарат орталығы Еңбек және халықты әлеуметтік қорғау министрлігінің баспасөз қызметіне сілтеме жасап.
Ең көп сұранысқа ие салалардың көш басында білім беру саласы тұр (14 мың жұмыс орны). Сондай-ақ қызмет көрсетудің өзге де түрлері (12,5 мың), денсаулық сақтау және әлеуметтік қызмет (8,6 мың), құрылыс (8 мың), ауыл, орман және балық шаруашылығы (7,5 мың) және өңдеу өнеркәсібі (6,9 мың) секторларында да жұмыс орындары көптеп ұсынылуда.
Өңірлер бойынша алғанда ең көп бос жұмыс орны Астана қаласында (8,3 мың), Павлодар облысында (5,5 мың), Алматы қаласында (5,2 мың), Түркістан облысында (5,1 мың) және Атырау облысында (5 мың) тіркелді.
Жұмыс берушілердің басым бөлігі, яғни бос орындардың 43%-ы орта деңгейлі білікті мамандарды іздейді. Төмен біліктілікті талап ететін орындар 31%-ды алса, жоғары білікті мамандарға сұраныс 26%-ды құрап отыр.
Жұмыс іздеушілер тарапынан мамыр айында 91,6 мың түйіндеме жарияланды. Олардың арасында 35 жасқа дейінгі жастар басым (41%). 35–44 жас аралығындағы үміткерлердің үлесі – 28%, 45–54 жастағылар – 20%, ал 55 жастан асқандар – 11%. Жұмыс іздегендердің 52%-ы – әйелдер, 48%-ы – ерлер.
Үміткерлердің мамандық деңгейі нарықтағы сұранысқа сай келеді: түйіндемелердің 40%-ын орта деңгейлі білікті мамандар, 31%-ын жоғары білікті, ал 29%-ын төмен білікті жұмыс іздеушілер жолдаған.
Мамыр айында ең жоғары жалақы ұсынылған мамандықтардың қатарында өндіруші өнеркәсіптегі өндіріс бастығының орынбасары (≈1,45 млн теңге), ақпаратты қорғау жөніндегі инженер (≈1,23 млн теңге) және бас дәнекерлеуші (≈1,24 млн теңге) лауазымдары бар.
Ал жұмыс іздеушілердің өздері сұраған ең жоғары жалақы мөлшері кеме капитаны (≈8,7 млн теңге), басшының орынбасары (≈3,7 млн теңге) және ұшқыш (≈2,8 млн теңге) позицияларына үміткерлерде тіркелді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
