• Басты бет
• Экономика
• QAZAQGAZ AIMAQ шарттарында кәсіпкерлер мен инвесторларға қатысты құқық бұзушылықтар анықталды

QAZAQGAZ AIMAQ шарттарында кәсіпкерлер мен инвесторларға қатысты құқық бұзушылықтар анықталды

Онда компания тым көп өсімпұл есептеу бойынша шарттарды жазып көрсеткен

QAZAQGAZ AIMAQ шарттарда бизнес пен инвесторлардың құқықтарын бұзып, оларға мөлшерлес емес өсімпұл есептеген. Мұндай құқық бұзушылықтарды Жетісу облысының прокуратурасы анықтады, деп хабарлайды Kapital.kz іскерлік ақпарат орталығы қадағалау органының баспасөз қызметіне сілтеме жасап.

«Талдықорған қаласының прокуратурасы Инвесторлардың құқықтарын қорғау жөніндегі комитеттің үйлестіруімен ауыл шаруашылығы өндірісі, өңдеу, жол құрылысы, тамақ өнеркәсібі, құрылыс материалдары, аккумуляторлар және тоқыма өнімдерін өндіру салаларында жобаларды іске асырып жатқан 10 инвестордың құқықтарын қорғады. Өңірге салынған инвестицияның жалпы көлемі шамамен 480 жұмыс орнын құрумен 9,4 млрд теңгені құрады», - деп хабарлайды прокуратура.

Қадағалау органы жүргізген талдау барысында «QAZAQGAZ AIMAQ» АҚ инвесторлармен газбен жабдықтауды қамтамасыз етуге шарттар жасасқаны, олардың жекелеген ережелері қолданыстағы заңнама талаптарына және бекітілген нормативтерге сәйкес келмегені, бұл кәсіпкерлік субъектілерінің құқықтарын бұзғаны және тұтынушылардың заңды мүдделерін шектегені анықталды.

«Атап айтқанда, мерзімін өткізіп алған әрбір күн үшін оның ең жоғары мөлшерін шектемей, қайта қаржыландыру мөлшерлемесінің 1,5 еселенген мөлшерінде мөлшерлес емес өсімпұл есептеуді көздейтін шарттар анықталды. Аталған шарт тұтынушылардың жағдайын нашарлатты және энергетика министрінің бұйрығымен бекітілген Үлгілік шарттың талаптарына сәйкес келмеді», - деп түсіндірді ведомствода.

Анықталған фактілер бойынша Талдықорған қаласының прокуратурасы Жетісу облысы бойынша Сауда және тұтынушылардың құқықтарын қорғау департаментіне прокурорлық қадағалау актісін енгізді. Оны қарау қорытындысы бойынша газбен жабдықтаушы ұйым шарттардың шарттарын заңнама талаптарына сәйкес келтірді.

«Инвесторлармен жасасқан шарттардан бөлек, «QAZAQGAZ AIMAQ» АҚ өңірдегі тағы 526 кәсіпкерге қатысты осындай құқық бұзушылықтарға жол берген. Прокуратураның араласуының арқасында барлық зардап шеккен бизнес субъектілерінің құқықтары сәтті қорғалды», - деп толықтырды құқық қорғау органында.

Мұндай құқық бұзушылықтарды анықтау және жою жөніндегі жұмыс тұрақты бақылауда. Жетісу облысының прокуратурасы әкімшілік кедергілерге тап болған инвесторларды 8 (771) 131 04 44 телефондары бойынша немесе 115 Call-орталығына хабарласуға шақырады.

Бұған дейін Алматыда 31 инвесторға негізсіз салық салынған болатын. Мемлекеттік кірістер комитетінің органдары олардың индустриялық аймақ аумағында жұмыс істейтінін ескермеген.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Сізге қызықты болуы мүмкін

Kapital.kz-ті оқыңыз