Президент түркі мемлекеттерін ынтымақтастықты жандандыруға шақырды
Біз күрделі әрі тұрақсыз геосаяси жағдайда өмір сүріп жатырмыз, деді Қасым-Жомарт Тоқаев
Түркі мемлекеттерінің бірлігі турбулентті кезеңде ерекше маңызға ие. Бұл туралы Қазақстан президенті Түркі мемлекеттері ұйымының бейресми саммиті барысында айтты, деп хабарлайды Ақорданың баспасөз қызметі.
Біз халықаралық геосаяси ахуал аса күрделі және құбылмалы дәуірді бастан өткерудеміз.
«Әлемдік және аймақтық деңгейдегі бәсеке күшейіп барады. Қарулы қақтығыстар, соғыстар толастар емес. Мұның бәрі әлем экономикасына кері әсер етіп жатқанын бәріміз көріп отырмыз. Таяу Шығыстағы жағдайдың салдарын көршілес аймақ елдері де сезіне бастады. Осындай алмағайып кезеңде түркі мемлекеттерінің ауызбіршілікте болуы – өте маңызды. Себебі халықтарымызға ортақ сан ғасырлық шежіреміз бар. Қазіргі таңда түркі елдері заман талабын ескеріп, экономика және инвестиция саласындағы ықпалдастықты нығайтуы керек, ортақ мүдде жолында күш жұмылдыруға тиіс деп санаймын», – деді ол.
Айта кетейік, саммит Түркістан қаласында өтіп жатыр. Президенттің айтуынша, «іс-шараның басты миссиясы – бауырлас түркі елдерінің көшбасшыларымен кездесу және жаңарған қаланы әлемдік қауымдастыққа таныстыру».
«Аймақтың экономикалық әлеуеті жыл өткен сайын артып келеді. Былтыр облыстың экономикасы 9,3 пайызға өсті, оның көлемі 10 миллиард доллардан асты. Аймаққа 3,5 миллиард доллар инвестиция тартылды. Алқалы жиынды осында өткізудің мақсаты – атажұртта бауырлас елдердің көшбасшыларымен жүздесу, қайта түлеген Түркістанды төрткүл дүниеге таныту. Біз киелі орданың тарихы қандай терең болса, болашағы да сондай жарқын боларына нық сеніммен қараймыз. Осы мүмкіндікті пайдаланып, бүгін Түркістанда Өзбекстанның қолдауымен жаңа зәулім мешіт ашылғанын үлкен ризашылықпен атап өткім келеді. Ерекше тарту жасағаны үшін Өзбекстан Президенті, аса қадірлі Шавкат Миромонұлы Мирзиёевке және өзбек халқына алғысымды білдіремін. Елдеріміздің руханиятындағы осы мешіттің орны ерекше болмақ. Бұл – қазақ-өзбек халықтары ынтымағының тарихи символы», – деді мемлекет басшысы.
Бұған дейін Қасым-Жомарт Тоқаев пен Шавкат Мирзиёев Түркістандағы жаңа мешітті аралап көрген болатын. Мешіт Өзбекстан басшысының Түркістан тұрғындары мен барша қазақстандықтарға тартуы ретінде салынған.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
