Алматы әкімінің экс-орынбасары құрылыс бизнесімен айналысатын болды
Сапарбек Тұяқбаев Rise Development Kazakhstan Ltd құрылыс компаниясын тіркеді
Алматы әкімінің бұрынғы орынбасары Сапарбек Тұяқбаев «Астана» халықаралық қаржы орталығының алаңында Rise Development Kazakhstan Ltd компаниясын тіркеді, деп хабарлайды Kapital.kz іскерлік ақпарат орталығы АХҚО тәуелсіз реттеушісі – AFSA-ға сілтеме жасап.
Компания құрылтайшылары қатарында Көбей Жанбыршы мен Нұрлан Құрақбай да бар. Компания АХҚО алаңында 2026 жылғы 15 мамырда тіркелген. Оның қызмет бағыты тұрғын үй ғимараттарын салу және құрылыс жобаларын әзірлеу деп көрсетілген. CEO ретінде Нұрлан Құрақбай тіркелген.
Сапарбек Тұяқбаев 1979 жылғы 1 қаңтарда Қызылордада дүниеге келген.
2001 жылы Түркиядағы Таяу Шығыс техникалық университетін халықаралық қатынастар мамандығы бойынша тәмамдаған. 2004 жылы Канададағы Торонто университетінде гуманитарлық ғылымдар магистрі дәрежесін алған.
2005-2006 жылдары Қазақстан Республикасының Мемлекеттік қызмет істері агенттігінде құқықтық қамтамасыз ету департаментінің мемлекеттік қызмет саласындағы заңнаманың сақталуын бақылау бөлімінде бас сарапшы міндетін атқарушы және бас сарапшы болды.
2006-2007 жылдары Қазақстан Республикасының Ресей Федерациясындағы Елшілігінде үшінші хатшы қызметін атқарды.
2007 жылдың наурыз-сәуір айларында Қазақстан Республикасы индустрия және сауда министрлігінің стратегиялық жоспарлау департаментінде ведомстволық ұйымдардың қызметін үйлестіру және бақылау бөлімінің басшысы болды.
2007-2008 жылдары осы министрліктің стратегиялық жоспарлау және жиынтық талдау департаменті – хатшылығында стратегиялық жоспарлау бөлімін басқарды.
2008-2009 жылдары Қазақстан Республикасы Президенті Әкімшілігінің әлеуметтік-экономикалық мониторинг бөлімінде консультант қызметін атқарды.
2009 жылдың шілде-қыркүйек айларында Президент Кеңсесінің консультанты болды.
2009-2012 жылдары Президент Әкімшілігінің мемлекеттік бақылау және ұйымдастыру-аумақтық жұмыс бөлімінде мемлекеттік инспектор қызметін атқарды.
2012 жылы «Шымкент» әлеуметтік-кәсіпкерлік корпорациясы» ұлттық компаниясы» АҚ директорлар кеңесінің төрағасы болды.
2012-2016 жылдары Оңтүстік Қазақстан облысы әкімінің орынбасары қызметін атқарды.
2016-2017 жылдары Қазақстан Республикасы Инвестициялар және даму министрлігінің Инвестициялар комитетін басқарды.
2017-2019 жылдары «Kazakh Invest» ҰК» АҚ басқарма төрағасы болды.
2019-2020 жылдары Алматы қаласы әкімінің орынбасары қызметін атқарды.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
