Жетісу облысында қуаты 1 ГВт болатын жел электр станциясы салынады
Жобаны «Самұрық-Энерго» қытайлық инвесторлармен бірлесіп жүзеге асырады
Жетісу облысында қуаты 1 ГВт болатын жел электр станциясы салынады, деп хабарлайды Kapital.kz іскерлік ақпарат орталығы облыс әкімдігінің баспасөз қызметіне сілтеме жасап.
Өңір басшысы Бейбіт Исабаевтың «Самұрық-Энерго» АҚ басшылығымен кездесуі барысында белгілі болғандай, жобаны «Самұрық-Энерго» АҚ қытайлық инвесторлармен бірлесіп жүзеге асырады деп күтіліп отыр.
Жел паркін салу жобасы туралы «Самұрық-Энерго» АҚ басқарма төрағасы Қайрат Мақсұтов егжей-тегжейлі айтып берді. Оның айтуынша, жобаны іске асыру облысты электрмен жабдықтаудың сенімділігін қамтамасыз етуге мүмкіндік береді. Жобаны жүзеге асыруға қатысты барлық мәселелерді талқылаған соң, кездесуге қатысушылар жақын арада жобалау-іздестіру жұмыстарын жүргізу туралы келісті.
«Бұл мультипликативті әсер беретін ірі жоба. Өз тарапымыздан қолданыстағы заңнама аясында барлық қажетті қолдау көрсетілетін болады. Сонымен қатар бизнестің әлеуметтік жауапкершілігі туралы да ұмытпау маңызды», - деді Бейбіт Исабаев.
Кездесу қорытындысы бойынша тараптар жобаны іске асыруды одан әрі жандандыруға және инвестициялық өзара іс-қимылды әрі қарай дамытуға мүдделі екендіктерін растады.
Бұған дейін Қазақстан мен Қытай 2 млрд долларға жаңартылатын энергия көздері жобаларын іске қосатыны хабарланған болатын.
Қазақстанда 241 энергия көзі бар. Олардың 160-тан астамы ЖЭК-ке жатады.
2025 жылы Қазақстан Республикасында 118 млрд кВт·сағ өндірілді. KEGOC басқарма төрағасы Наби Айтжанов елдегі электр энергиясының тапшылығы 330 МВт құрайтынын хабарлаған еді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
