Депутат Проблемалық кредиттер қорын тарату немесе реформалауды ұсынды
Татьяна Савельева мемлекеттік активтерді басқару тетіктері барынша ашық болуы тиіс екенін айтты
«Проблемалық кредиттер қоры» АҚ-ның қазіргі жұмыс моделі түбегейлі қайта қарауды қажет етеді. Бұл туралы депутат Татьяна Савельева мәлімдеді, деп хабарлайды Kapital.kz іскерлік ақпарат орталығының тілшісі.
«2012 жылы уақытша дағдарысқа қарсы құрал ретінде құрылған Проблемалық кредиттер қоры нақты аяқталу мерзімінсіз жұмысын жалғастырып келеді. Халықаралық тәжірибеге сәйкес, мұндай құрылымдар уақытша сипатта болып, мемлекеттің капиталдан кезең-кезеңімен шығу жоспары нақты белгіленуі тиіс. Қордың мерзімсіз квазимемлекеттік оператор ретіндегі қазіргі мәртебесі нарықтық тетіктерді бұрмалап, стресс-активтердің жеке нарығының дамуына кедергі келтіреді», - деді ол премьер-министр Олжас Бектеновтің атына жолдаған депутаттық сауалында.
Татьяна Савельева Жоғары аудиторлық палатаның деректеріне сүйене отырып, Ұлттық қорға 126 млрд теңге және 32,7 млрд теңге дивиденд аударылғанына қарамастан, активтерді басқару тиімділігі төмен күйінде қалып отырғанын айтты.
«Түскен кірістің елеулі бөлігі ұзақ уақыт бойы бюджетке аударылмай, қордың өз қарамағында жинақталған. Мұндай жағдайға жол берілмеуі қажет. Мемлекеттік жоспарлау жүйесінде Проблемалық кредиттер қоры мен қаржы министрлігі үшін өлшенетін тиімділік көрсеткіштері (KPI) жоқ. Келісімшарттардың орындалуын бақылау формалды сипатқа ие, ал ішкі нормативтік база ескірген. Сондай-ақ қордың әкімшілік шығындарының қазіргі қызмет көлеміне сәйкестігіне қатысты сұрақтар бар», – деді депутат.
Ол мемлекеттік активтерді басқару тетіктері барынша ашық болуы тиіс екенін атап өтті.
«AMANAT» фракциясының депутаттары:
- «Проблемалық кредиттер қоры» АҚ-ны реформалау немесе тарату бойынша нақты мерзімдері көрсетілген Жол картасын бекітуді;
- активтерді басқарудан түсетін барлық кірісті қор шоттарында жинақтамай, тікелей Ұлттық қорға және республикалық бюджетке аудару тәртібін енгізуді;
- Қор басшылығы мен қаржы министрлігінің профильдік бөлімшелері үшін мемлекетке қайтарылған қаражат көлеміне байланыстырылған нақты KPI көрсеткіштерін бекітуді;
- Қордың штат саны мен әкімшілік шығындарына аудит жүргізіп, оларды нақты портфель көлеміне сәйкестендіруді;
- қаржы министрлігі мен Қордың ішкі регламенттерін Жоғары аудиторлық палатаның ұсынымдарына сәйкестендіруді;
- нарықтық бәсекеге кедергі келтіретін артық салықтық жеңілдіктер мен преференцияларды сақтаудың орындылығын талдауды ұсынды.
Еске салайық, 2026 жылдың ақпанында ҰҚК-нің Сыбайлас жемқорлыққа қарсы қызметі прокуратураның үйлестіруімен қызметтік өкілеттігін асыра пайдаланды деген күдікпен «Проблемалық кредиттер қоры» АҚ-ның бұрынғы басқарма төрағасын ұстаған болатын.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
