Жалақы қорынан бірыңғай төлем бойынша пилоттық жоба жазда іске қосылады
Жобаға 500 компания қатысады деп жоспарланып отыр
Қазақстанда жаз мезгілінде жалақы қорынан бірыңғай төлем енгізу бойынша пилоттық жоба іске қосылады. Жобаға шамамен 500 компания қатысады. Олар кездейсоқ іріктеу арқылы немесе бизнестің ерікті түрде қатысуы негізінде таңдалады. Бұл туралы мәжіліс кулуарында журналистерге премьер-министрдің орынбасары – ұлттық экономика министрі Серік Жұманғарин айтты, деп хабарлайды Kapital.kz іскерлік ақпарат орталығының тілшісі.
«Біз пилоттық жобаны өңірлер бойынша емес, компаниялар тізімі бойынша өткізгіміз келеді – шағын, орта және ірі бизнесті қамтимыз. Бұл жүйенің қалай жұмыс істейтінін көргіміз келеді. Мұның бәрі ақпараттық технологиялармен тығыз байланысты. Жасырып отырған жоқпын: бізде кейде ақпараттық жүйелер істен шығып жатады», – деді Серік Жұманғарин.
Қатысушыларды іріктеу тетігі туралы сұраққа жауап берген ол, нақты схема әлі бекітілмегенін айтты.
«Кездейсоқ іріктеу болуы мүмкін. Немесе кейбір компаниялар өз еркімен қатысуға ниет білдіреді. Бұл мәселені Ұлттық кәсіпкерлер палатасының қарауына береміз. Бастапқы кезеңде пилоттық жобаға 500 компания қатысады деп ойлаймын», – деп түсіндірді вице-премьер.
Еске салайық, Салық кодексін енгізу жөніндегі жобалық кеңсе отырысында ұлттық экономика бірінші вице-министрі Азамат Әмрин жалақы қорынан төленетін төлемдер жүйесін жеңілдету бойынша ұсыныстарды таныстырған болатын. Қазіргі таңда жұмыс берушілер әлеуметтік және зейнетақы төлемдерінің алты түрін жүзеге асырады, сондай-ақ жеке табыс салығы мен әлеуметтік салықты бөлек аударады. Соның нәтижесінде сегіз түрлі төлем тапсырмасы қалыптасады.
Ұсынысқа сәйкес, сегіз төлем тапсырмасының орнына бірыңғай төлем енгізу көзделіп отыр. Төлем екінші деңгейлі банктер мен Еңбек министрлігінің ақпараттық жүйелері арқылы өтіп, кейін Бірыңғай жинақтаушы зейнетақы қорына, Мемлекеттік әлеуметтік сақтандыру қорына, Медициналық сақтандыру қорына және Мемлекеттік кірістер комитетіне автоматты түрде бөлінеді. Бастаманы алдымен пилоттық режимде іске асыру ұсынылған.
Жалпы, Жобалық кеңсе отырыстарында Салық кодексі нормаларын іске асыруға қатысты 60-тан астам мәселе қаралды.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
