Серік Жұманғарин ШОБ секторындағы компаниялардың жабылуына қатысты пікір білдірді
Министрдің айтуынша, әзірге жұмыссыздықтың өсуі мен шағын бизнес ахуалының күрт нашарлау белгілері байқалмайды
Премьер-министрдің орынбасары – ұлттық экономика министрі Серік Жұманғарин елдегі шағын және орта бизнес субъектілері санының қысқаруына қатысты жағдайға түсініктеме берді. Оның айтуынша, соңғы бір жарым жылда 200 мыңнан астам компанияның жабылғаны туралы деректерге қарамастан, еңбек нарығында жағымсыз сценарийлердің жүзеге асуына негіз жоқ, деп хабарлайды Kapital.kz іскерлік ақпарат орталығының тілшісі.
Мәжіліс кулуарында журналистер министрден ШОБ субъектілерінің қызметін тоқтатуы аясында жұмыссыздықтың өсу қаупіне баға беруді сұрады.
«Үкіметтің барлық жағдайға арналған жоспары бар. Әзірге сіз айтып отырған сценарийлерді жүзеге асыруға негіз жоқ. Біз төрт айдың қорытындысы бойынша көрсеткіштерді жарияладық – экономика өсімі 3,6%. Бұл ретте біз 5 млн тонна мұнай өндіре алмадық. Егер сол қаражат экономикаға қосымша құйылғанда, өсім 6%-дан асып кетер еді. Қазақстан экономикасы қазір шикізаттық секторсыз да өсе алатынын көрсетіп отыр. Қазіргі драйверлер – өңдеу өнеркәсібі, мұнда өсім шамамен 10%, сондай-ақ құрылыс пен сауда салалары», – деді Серік Жұманғарин.
БАҚ өкілдері кәсіпкерлер арасындағы іскерлік белсенділік одан әрі төмендеген жағдайда қандай шаралар қарастырылып жатқанын да нақтылады.
Өз кезегінде ұлттық экономика министрлігінің басшысы қазіргі жағдайды алаңдатарлық деп санамайтынын айтты. Оның сөзінше, жабылған компаниялардың едәуір бөлігі іс жүзінде толыққанды қызмет жүргізбеген.
«Менің ойымша, қазір ШОБ белсенділігі жеткілікті деңгейде жақсы. Бұған алаңдайтындай себеп көріп тұрған жоқпын. 99,5 мың компания ешқандай қызмет атқармаған, 13 мыңы – екінші компаниясы болғандар, 39 мыңы өзін-өзі жұмыспен қамтығандар санатына өткен. Яғни 207 мың компанияның 150 мыңы ештеңе жоғалтқан жоқ», – деп түсіндірді министр.
Бұған дейін Қазақстанда 34 мыңнан астам кәсіпкердің салық режимін ауыстырғаны хабарланған болатын.
Еске салайық, биылғы 1 қаңтардан бастап жаңа Салық кодексі күшіне енді.
2025 жылғы 18 шілдеде Қасым-Жомарт Тоқаев жаңа Салық кодексіне және «Салық салу мәселелері бойынша Қазақстан Республикасының кейбір заңнамалық актілеріне өзгерістер мен толықтырулар енгізу туралы» ілеспе заңға қол қойған еді. Құжатта қосылған құн салығы (ҚҚС) мөлшерлемесін арттыру және ҚҚС бойынша есепке қою шегін 10 000 АЕК-ке дейін төмендету қарастырылған.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
