Қазақстанда өңдеу өнеркәсібі мен құрылыс саласы өсім көрсетті
Алғашқы үш айда елде 3,9 млн шаршы метр тұрғын үй пайдалануға берілді
Қазақстанның өңдеу өнеркәсібі саласы 2026 жылдың І тоқсанында 8,5% деңгейінде өсім көрсеткен. Бұл туралы бүгін Үкімет отырысында Өнеркәсіп және құрылыс министрі Ерсайын Нағаспаев мәлімдеді, деп хабарлайды Kapital.kz іскерлік ақпарат орталығы.
Оның сөзінше биылғы жылдың алғашқы тоқсанында өңдеу өнеркәсібінің негізгі секторларында жиынтық көрсеткіш 8,5% деңгейінде оң динамика байқалады.
«Машина жасауда өндіріс 21,9%-ға, химия өнеркәсібінде – 2,4%-ға, жеңіл өнеркәсіпте 51,1%-ға өсті. Құрылыс материалдарының өндірісі – 37,1%-ға, резеңке және пластмасса бұйымдарын шығару 26,9%-ға артты», – деді Ерсайын Нағаспаев.
Бұл ретте, Ерсайын Нағаспаев министрлік ел өңірлерінде жаңа өндірістерді іске қосу, жергілікті қамтуды арттыру және инвестициялық қызметті белсенді түрде ынталандыру арқылы тиісті салаларда тұрақты өсім қарқынын сақтау бағытындағы жұмыстарын жалғастыратынын жеткізді.
Айта кетейік, 2025 жылдың қорытындысы бойынша Қазақстанның ЖІӨ-дегі өңдеу өнеркәсібінің үлесі 12,7%-ға жеткен.
Сонымен қатар министр еліміздің құрылыс саласындағы тұрақты өсім жөнінде айта келіп, осы жылдың 3 айының қорытындысы бойынша құрылыс жұмыстарының көлемі өткен жылдың сәйкес кезеңімен салыстырғанда 14,8%-ға артып, шамамен 1,2 трлн теңгені құрағанын атап өтті.
Министрдің мәліметінше, 2026 жылдың І тоқсанында Қазақстанда 3,9 млн шаршы метр тұрғын үй пайдалануға берілген, бұл өткен жылғы деңгейден 3,8%-ға жоғары. Бұл ретте өсім 18 өңірде тіркелді. Ең жоғары көрсеткіш Абай (41,3%), Қарағанды облыстарында (26%) және Шымкент қаласында (14,7%) байқалды.
Биыл елімізде 7 жыл ішінде 111 млн шаршы метр тұрғын үй салу жоспарланып отыр.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
