Сауда заңнамасын бұзған 1,4 мыңнан астам кәсіпкер жауапкершілікке тартылды

Қазақстанда сауда саласындағы мемлекеттік бақылау күшейтіліп, қадағалау жұмысының тиімділігі артып келеді. Биыл жыл басынан бері 1 485 кәсіпкерлік субъектісі әкімшілік жауапкершілікке тартылған, деп хабарлайды Kapital.kz іскерлік ақпарат орталығы ҚР Сауда және интеграция министрлігіне сілтеме жасап.

Бұл көрсеткіш 2025 жылы тіркелген құқық бұзушылықтардың жалпы көлемінің шамамен 43%-ына тең (3 437 қаулы). Ал салынған айыппұлдардың жалпы сомасы 56 млн теңгеден асты. Ведомство мұны құқық бұзушылықтарды анықтау деңгейінің артқанымен және бақылау жұмыстарының жүйелі жүргізілуімен байланыстырады.

Негізгі заңбұзушылық бұрынғысынша әлеуметтік маңызы бар азық-түлік тауарларына белгіленген шекті сауда үстемесін асыру болып отыр. Жыл басынан бері қабылданған қаулылардың барлығы айыппұл түрінде рәсімделген.

Министрлік дерегінше, құқық бұзушылықтардың басым бөлігі сауда үстемесінің 15%-дан жоғары белгіленуімен байланысты. Сонымен қатар әртүрлі бағаларды қолдану, баға белгілерінің болмауы, заң талаптарын қайталап бұзу, сондай-ақ бақылаушы органдардың жұмысына кедергі келтіру фактілері де тіркелген.

Баға қалыптастыру процесі өндірушіден бастап соңғы тұтынушыға дейінгі барлық кезеңдерде бақылауға алынған. Осы мақсатта өңірлерде делдалдық схемаларды анықтайтын арнайы комиссиялар жұмыс істейді.

Жыл басынан бері мұндай комиссиялардың 302 отырысы өтіп, 850 заң бұзушылық анықталған. Нәтижесінде 777 әкімшілік қаулы қабылданып, тауар жеткізу тізбегінен 73 тиімсіз делдал шығарылған.