Қазақстанда жеке кәсіпкерлер саны 1,795 млн-ға дейін азайды

2026 жылғы 1 наурыздағы жағдай бойынша Қазақстанда 1 795,6 мың жеке кәсіпкер тіркелген. Бұл өткен жылмен салыстырғанда 1,1%-ға аз, ол кезде олардың саны 1 814,2 мың болған, деп хабарлайды Kapital.kz іскерлік ақпарат орталығы ҚР ұлттық статистика бюросы деректеріне сілтеме жасап.

Олардың ішінде 1 732,8 мыңы белсенді мәртебеге ие, бұл жалпы санның 96,5%-ын құрайды.

Салалар бөлінісінде тіркелген ЖК-ның ең көп үлесі көтерме және бөлшек сауда саласына тиесілі – 667 мың немесе 37,1%. Сондай-ақ өзге де қызметтер көрсету саласында 258,2 мың, ауыл шаруашылығында 249 мың кәсіпкер тіркелген. Ең аз көрсеткіш мемлекеттік басқару саласында – 151 жеке кәсіпкер

Жеке кәсіпкерлікпен айналысушылардың басым бөлігі республикалық маңызы бар қалаларда орналасқан – 35,5%. Ең көп кәсіпкер Алматы мен Астана қалаларында тіркелген: тиісінше 288,7 мың және 204,3 мың. Үздік үштікті 196,2 мың жеке кәсіпкері бар Түркістан облысы түйіндейді. Ең төмен көрсеткіш Ұлытау облысы өңірінде – 16,1 мың.

Барлық тіркелген жеке кәсіп иелерінің 39,1%-ы 35 жасқа дейінгі азаматтар. Сонымен қатар, жеке кәсіпті басқаратын әйелдердің үлесі 50,4%-ды құрайды.

Бұған дейін 2026 жылғы ақпанда жеке кәсіпкерлердің несиелері 1,2%-ға өсіп, 3,1 трлн теңгеге жеткені хабарланған болатын.