Қарағандыда клинкерлік плитка шығаратын зауыт салынып жатыр
Жаңа өндіріс импортты алмастырып, онда 170 жұмыс орны ашылады
Қарағандыда премиум санаттағы керамикалық өнімдер шығаратын жаңа зауыттың құрылысы қарқынды жүріп жатыр. Жоба іске қосылғаннан кейін елде алғаш рет қасбеттік клинкерлік плитка өндірісі жолға қойылады, деп хабарлайды Kapital.kz іскерлік ақпарат орталығы
QAZCLINKER компаниясының директоры Дәулет Смағұловтың айтуынша, кәсіпорынның жобалық қуаты жылына 1 млн шаршы метрге дейін өнім шығаруға жетеді.
«Біздің ұстанымымыз – қолжетімді бағада премиум өнім өндіру. Қазір технологиялық жабдықтарды монтаждау жұмыстары жүргізілуде. Жабдықтар толық сатып алынып, кезең-кезеңімен жеткізілуде. Жобаны өз қаражатымыз есебінен және Қазақстан Даму Банкінің қолдауымен жүзеге асырып жатырмыз», — деді Дәулет Смағұлов.
Жаңа өндіріс ішкі нарықтағы импорт үлесін қысқартуға және құрылыс материалдарының құнын төмендетуге мүмкіндік береді. Сонымен қатар шамамен 170 жаңа жұмыс орны ашылады деп жоспарланып отыр. Кәсіпорын өнімдерін ішкі нарықпен қатар экспортқа шығару жоспарланған.
Компания өкілдерінің айтуынша, жобаны Қарағанды облысында жүзеге асыруға қолайлы логистика мен дамыған инфрақұрылым себеп болған. Сондай-ақ өндіріс үшін маңызды факторлардың бірі – табиғи газға қосылу мүмкіндігі.
Қазіргі таңда зауыт алаңында барлық қажетті инфрақұрылым дайын, кәсіпорын бірден газбен жұмыс істейтін болады. Зауытты іске қосу биылға жоспарланып отыр.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
