Alit Holding Жамбыл облысында зауыт салды
Мәрмәр ұнтағы мен құрғақ құрылыс қоспалары өндірісін іске қосуға шамамен 4 млрд теңге құйылды
Жамбыл облысында Alit Holding мәрмәр ұнтағы мен құрғақ құрылыс қоспаларын шығаратын жаңа өндірістік желілерді іске қосты. Облыс әкімінің бірінші орынбасары Нұржан Қалендеров бұл жоба өңір экономикасын әртараптандыруға, отандық өндірісті дамытуға және құрылыс саласының тиімділігін арттыруға маңызды үлес қосатынын атап өтті.
Облыс әкімдігінің хабарлауынша, құрғақ қоспалар өндіретін желі жылына 150 мың тоннаға дейін өнім шығаруға қауқарлы. Мұндай көлем жыл сайын 70 мыңға дейін пәтерді жөндеуді қамтамасыз етуге мүмкіндік береді. Ал мәрмәр ұнтағын өндіру желісі шикізатты өңдеуден бастап дайын өнім шығаруға дейінгі толық өндірістік циклді қамтиды. Оның қуаттылығы жылына 120 мың тоннаға дейін жетеді.
«Екі желіні іске қосуға салынған инвестицияның жалпы көлемі 4 млрд теңгені құрады. Өндіріс толықтай автоматтандырылған. Жобаны жүзеге асыру нәтижесінде шамамен 100 жаңа жұмыс орны құрылады. Өнім Қазақстанның барлық өңірлеріне жеткізіліп, сондай-ақ көршілес елдерге экспортталады деп жоспарлануда», – деп нақтылады әкімдік.
Сондай-ақ биыл өңірде жалпы құны 471 млрд теңгені құрайтын 47 инвестициялық жобаны жүзеге асыру жоспарланып отырғаны, нәтижесінде 1 000-нан астам жұмыс орны ашылатыны айтылды. Ал 2026-2029 жылдарға арналған инвестициялық портфельде жалпы құны 5,6 трлн теңге болатын 116 ірі жоба қалыптастырылған.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
