Қызылордада ibis үш жұлдызды қонақүйінің құрылысы басталды

Қызылордада Президент саябағы аумағында ibis қонақүйінің іргетасын қалау және капсула салу рәсімі өтті, деп хабарлайды Kapital.kz іскерлік ақпарат орталығы тілшісі облыс әкімдігінің баспасөз қызметіне сілтеме жасап.

«2022-2024 жылдары облыс экономикасына – шамамен 1 трлн 600 млрд теңге, 2025 жылы 750 млрд теңгеден астам инвестиция тартылды. 2021 жылмен салыстырғанда инвестиция көлемі 233%-ға өсті. Жеке инвестициялардың үлесі 70%-ды құрады. Экономиканы әртараптандыру мақсатында алдағы үш жылда жалпы құны шамамен 1 трлн 900 млрд теңге болатын 48 инвестициялық жоба іске асырылып, 10 308 жаңа жұмыс орны құрылады. Биыл жалпы құны 753 млрд 300 млн теңгені құрайтын 14 ірі жобаның құрылысы жүргізілуде. Заманауи талаптарға сай салынатын бұл қонақүй шетелдік және отандық туристер мен қонақтарды қабылдайтын, сондай-ақ іскерлік байланыстарды нығайтатын орталыққа айналады деп сенемін», – деді Қызылорда облысының әкімі Нұрлыбек Нәлібаев.

IBIS үш жұлдызды қонақүйі жобасының құны 6 млрд теңгені құрайды, мұнда бір мезетте 100-ден астам қонақ орналаса алады. Нысан пайдалануға берілгеннен кейін шамамен 100 адам жұмыспен қамтылады.

Бұған дейін Accor қонақүй тобы FC Elimai клубымен Семей қаласында ibis қонақүйін салу туралы ынтымақтастық туралы келісімге қол қойғаны хабарланған болатын. ibis брендімен 100 нөмірлі жаңа қонақүй 2027 жылы ашылады.