• Басты бет
• Lifestyle
• Алматы мейрамханалары халықаралық стандарт бойынша бағаланады: қалаға Gault&Millau гиді келеді

Алматы мейрамханалары халықаралық стандарт бойынша бағаланады: қалаға Gault&Millau гиді келеді

Оңтүстік шаһар жаһандық гастрономиялық экожүйенің бір бөлігіне айналады

Францияның беделді гастрономиялық гиді Gault&Millau Алматы нарығына шығады. Мегаполис жаһандық гастрономиялық экожүйенің бір бөлігіне айналады, деп хабарлайды Kapital.kz іскерлік ақпарат орталығы оңтүстік астана әкімдігінің баспасөз қызметіне сілтеме жасап.

«Өңір тарихында алғаш рет Алматы жаһандық гастрономиялық күн тәртібін қалыптастыратын әлемдегі ең беделді мейрамхана гидтерінің бірі – Gault&Millau-мен ынтымақтастықты бастайды. Бұл оқиғаның стратегиялық маңызы Алматы үшін ғана емес, бүкіл Орталық Азия үшін ерекше. Осындай деңгейдегі гастрономиялық гид алғаш рет өңір нарығына шығып, халықаралық қауымдастыққа жергілікті мейрамхана индустриясын, аспаздарды және бірегей гастрономиялық мәдениетті таныстырады», – делінген ақпаратта.

Gault&Millau – 50 жылдан астам тарихы бар аңызға айналған француз гастрономиялық гиді. Ол Michelin Guide қатар жоғары асүй индустриясындағы негізгі әлемдік бағдарлардың бірі саналады. Әкімдік мәліметінше, гидтің Алматыда болуы қаланың жаңа трендтер қалыптасатын, үздік мейрамханалар анықталатын және жаңа туристік бағыттар жасалатын жаһандық гастрономиялық экожүйеге қосылғанын білдіреді.

«Алматы үшін бұл – халықаралық деңгейдегі маңызды оқиға. Бүгінде гастрономия қалалардың туристік тартымдылығын арттыратын негізгі драйверлердің біріне айналып отыр. Gault&Millau-мен серіктестік Алматыға гастротуристердің жаһандық аудиториясына жол ашып, қаланың әлемдік туристік картадағы позициясын күшейтеді», – деп атап өтті Алматы қаласының туризм басқармасы.

Қазіргі таңда Алматы тек тау туризмімен, табиғатымен және мәдени мұрасымен ғана танымал емес. Бұл – мейрамхана индустриясы қарқынды дамып келе жатқан, жергілікті өнімдері сапалы, талантты аспаздары бар және Орталық Азиядағы жетекші гастрономиялық хабқа айналуға ұмтылатын заманауи мегаполис, деп қорытындылады қала әкімдігі.

Бұған дейін Алматының өңірлік туристік картадағы позициясын күшейтіп жатқаны хабарланған болатын. 2025 жылы демалыс пен leisure-туризмге қызығушылықтың өсуі жалғасқан.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз