Боранбаевтан қайтарылған активтер сатылады: Астанадағы Fitnation тағдыры не болмақ?

Астанада кәсіпкер Қайрат Боранбаевтан мемлекетке қайтарылған активтерді сату мәселесі қаралды. Бұл тақырып қалалық мәслихатта өткен көпшілік тыңдауда талқыланды, деп хабарлайды Kapital.kz іскерлік ақпарат орталығы.

Күн тәртібінде коммуналдық меншіктегі төрт нысанды жекешелендіру мәселесі болды. Соның ішінде бұрын Қайрат Боранбаевқа тиесілі болған Fitnation фитнес-кешені мен Comfort Hotel Astana қонақүйі бар.

Фитнес-кешен Қазақстан Республикасы Үкіметінің 2025 жылғы 24 қазандағы № 894 қаулысына сәйкес жекешелендіру жоспарына енгізілген. Нысан 2004 жылы салынған. Жалпы аумағы 4 мың шаршы метр, жер телімі — 0,61 гектар.

Кешен құрамына 25 метрлік бассейн мен үш жаттығу залы кіреді. Сондай-ақ коворкинг аймағы және заманауи құралдармен жабдықталған тренажер залы бар. Оның баланстық құны шамамен 2 млрд теңге.

Спорт инфрақұрылымы ма, әлде коммерциялық актив пе?

Көпшілік тыңдауда бұл нысан бойынша қызу пікірталас туындады. Астана қаласының Дене шынықтыру және спорт басқармасының басшысы Василий Левит фитнес-орталықты мемлекет меншігінде қалдыруды ұсынды.

«Онда циклдік спорт түрлерімен, олимпиадалық спорт түрлерімен айналысатын спортшыларды дайындау үшін аса маңызды болып табылатын сапалы тренажер жабдықтары бар. Бүгінгі таңда бізде 300-ге жуық болашағынан үміт күттіретін спортшы осы фитнес-орталыққа тегін бару мүмкіндігіне ие. Бұл олардың өнер көрсетулеріне және медальдар жеңіп алуына оң әсерін тигізеді», деді ол.

Сондай-ақ нысан өзін-өзі қаржылық тұрғыда ақтап отырғаны айтылды.

Алайда мәслихат депутаты Кендебай Адамбеков бұл ұстаныммен келіспеді.

«Бұл — мемлекеттің, Президенттің тапсырмасы. Үкіметтің қаулысы бар. Сіздер тиісті шараларыңыздың бәрін осы жиналысқа дейін шешіп алуларыңыз керек еді. Бұл — фитнес орталық, онда кәсіби спортқа қажет ештеңе жоқ», деді депутат.

Бұл талқылау мемлекеттік активтерді басқару тәсіліне қатысты екі түрлі ұстанымды көрсетті: бір тарап нысанды спорт инфрақұрылымы ретінде сақтауды ұсынса, екіншісі оны коммерциялық актив ретінде нарыққа шығаруды қолдады.

Компромисс: ғимарат сатылады, құралдар-жабдықтар қалады

Нәтижесінде тараптар ортақ шешімге келді. Фитнес-кешен ғимараты жекешелендіріледі, ал ішіндегі спорттық құрал-жабдықтар коммуналдық меншікте қалады.

Олар кейін балалар мен жасөспірімдер спорт мектептеріне беріледі. Сонымен қатар болашақ инвестор үшін астаналық спортшыларға белгілі бір уақыт тегін жаттығуға мүмкіндік беру туралы талап енгізу ұсынылды.

Қонақүй де сатылады

Осылайша, жекешелендіру тек фитнес-кешенмен шектелмейді. Боранбаевтан қайтарылған тағы бір актив — Comfort Hotel Astana қонақүйі де сатылымға шығарылады. Қазіргі уақытта нысан сенімгерлік басқаруға берілген.

Активтер және мемлекеттік сатып алу басқармасының басшысы Нұрлан Әлімжановтың айтуынша, нысандар алдымен нарықтық бағалаудан өтіп, кейін ашық конкурс арқылы саудаға шығарылады.

«Бүгінде аталған нысанның табысы жыл сайын 20 пайызға артып келеді. Түскен пайда кешенді қайта жаңарту мен дамыту жұмыстарына жұмсалуда. Қолданыстағы заңнамаға сәйкес, қазіргі сенімгерлік басқарушының нысанды тікелей сатып алуға басым құқығы бар. Біз жыл соңына дейін нысанға бағалау жүргізіп, басқарушы тарапқа сатып алу туралы ұсыныс жолдаймыз. Егер олар бұл мүмкіндіктен бас тартса, нысан ашық сауда-саттыққа шығарылады», деді ол.