• Басты бет
• Мемлекет
• Арыстанбек Мұхамедиұлының компаниясына тиесілі болған «Қазақ энциклопедиясы» мемлекетке қайтарылды

Арыстанбек Мұхамедиұлының компаниясына тиесілі болған «Қазақ энциклопедиясы» мемлекетке қайтарылды

Бұл құрылымды жеке заңды тұлға заңсыз жекешелендірген болатын

Мемлекетке бұған дейін сотталған бұрынғы мәдениет министрі Арыстанбек Мұхамедиұлының компаниясына тиесілі болған «Қазақ энциклопедиясы» ЖШС-нің толық үлесі қайтарылды, деп хабарлайды Kapital.kz іскерлік ақпарат орталығы Алматы қаласы прокуратурасының баспасөз қызметіне сілтеме жасап.

«Прокуратура «Қазақ энциклопедиясы» ЖШС-нің 100% үлесін ҚР бұрынғы мәдениет және спорт министрі А. Мұхамедиұлымен байланысты компанияның заңсыз иелігінен мемлекетке қайтарды. 2015 жылы «Қазақ энциклопедиясы» ЖШС-нің 100% үлесін жеке заңды тұлға заңсыз жекешелендірген, жылжымайтын мүлік түріндегі активтер (Әуезов ауданындағы жер телімі бар, алаңы 2 108,3 м2 ғимарат) заңсыз иеліктен шығарылған. Мемлекеттің мүліктік мүдделерін қорғау мақсатында Алматы қаласы Әуезов ауданының прокуратурасы жекешелендіру шарты мен одан кейінгі мәмілелерді жарамсыз деп тану туралы талап арызбен сотқа жүгінді. Кассациялық соттың қаулысымен прокуратураның талап арызы толық көлемде қанағаттандырылды, құны 1,3 млрд теңге болатын актив мемлекетке қайтарылуға тиіс», - делінген ақпаратта.

Еске сала кетейік, 2024 жылы бұрынғы мәдениет министрі Арыстанбек Мұхамедиұлы 11 жылға бас бостандығынан айырылған болатын. Ол «Алтын адамның әлем музейлері бойынша шеруі» халықаралық көрме жобасын іске асыру кезінде аса ірі мөлшерде бюджет қаражатын жымқырғаны; лауазымдық өкілеттіктерін асыра пайдаланғаны және мемлекеттік мекемені басқаруға байланысты құқыққа қайшы әрекеттерді ұйымдастырғаны; аса ірі мөлшерде пара беруге оқталғаны үшін кінәлі деп танылды.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Сізге қызықты болуы мүмкін

Kapital.kz-ті оқыңыз