• Басты бет
• Мемлекет
• Астананың оң жағалауындағы жаңа LRT желісінің құрылысы қашан аяқталатыны белгілі болды

Астананың оң жағалауындағы жаңа LRT желісінің құрылысы қашан аяқталатыны белгілі болды

Елордадағы жеңіл рельсті көліктің алғашқы желісі жолаушылар үшін 16-17 мамырда іске қосылады

Астанада LRT-ның оң жағалаудағы жаңа желісін салуға арналған инженерлік іздестіру жұмыстары басталды. Жоба уақытылы қаржыландырылса, құрылысты үш жыл ішінде аяқтауға болады. Бұл туралы CTS басқарма төрағасы Асылбек Дүйсебаев баспасөз туры кезінде мәлімдеді, деп хабарлайды Kazinform агенттігінің тілшісі.

Оның айтуынша, геологиялық зерттеу жұмыстары жақын күндері басталады.

«Қазір оң жағалауда геологиялық зерттеу жұмыстарын жүргізіп жатырмыз. Алдағы күндері мұны өздеріңіз де көресіздер: жерді зерттейтін арнайы қондырғылар орнатылады. Нәтижелер дайын болғаннан кейін ескі вокзалға дейінгі құрылысқа бірден кірісеміз», – деді Асылбек Дүйсебаев LRT инфрақұрылымына арналған баспасөз туры барысында журналистер сұрағына жауап бере отырып.

Оның сөзінше, жаңа желінің бағыты Сығанақ көшесі арқылы өтіп, «Хан Шатыр» маңында Тұран даңғылына бұрылады. Одан әрі Кенесары көшесіне дейін жалғасып, кейін Қажымұқан Мұңайтпасов атындағы стадион жағына қарай бағыт алып, Жеңіс даңғылына шығады. Сол жерден ескі вокзалға дейін жалғасады.

CTS басшысы LRT желісін оң жағалау мен Қосшы бағытына қарай кеңейту жұмыстары толықтай эстакада арқылы жүзеге асырылатынын айтты.

«Бастапқыда Қосшы бағытына жер үстімен салу жоспарланған еді. Бірақ осы уақыт ішінде ол жақта белсенді құрылыс басталып кетті. Егер қазір LRT-ны жер үстімен жүргізсек, жолдарды жауып, көлік қозғалысына кедергі келтіреміз. Сондықтан қазіргі жағдайда басқа шешім жоқ. Жер үстімен салу жоспары бірнеше жыл бұрын жасалған, ол кезде бұл аумақта құрылыс болмаған», – деп түсіндірді ол.

Асылбек Дүйсебаев жобаны уақытылы қаржыландырған жағдайда оң жағалау бойындағы желі үш жыл ішінде толық салынып бітетінін нақтылады.

Еске салайық, Астанадағы LRT-ның алғашқы желісі жолаушылар үшін 16–17 мамыр күндері іске қосылады. Көлік күн сайын сағат 06:00-ден 23:00-ге дейін жұмыс істейді.

LRT операторының бағалауынша, желі іске қосылғаннан кейін алғашқы кезеңде жолаушылар ағыны 25 мыңнан 45 мың адамға дейін жетуі мүмкін.

LRT-ның алғашқы желісі Астана халықаралық әуежайын «Нұрлы жол» вокзалымен байланыстырады. Маршрут бойында 18 станция болады. Оның 11-і жер деңгейінде, ал тағы 7-еуі эстакадада орналасады.

Пойыздардың пайдалану жылдамдығы сағатына 60 шақырым, ал ең жоғары жылдамдығы сағатына 80 шақырым болады. Жолаушылар бүкіл бағытты шамамен 40 минутта жүріп өте алады.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз