- Басты бет
- Қаржы
- Депутат БЖЗҚ қорынан қаражат алудың жеткіліктілік шегінің күрт өсуіне қатысты пікір білдірді
Депутат БЖЗҚ қорынан қаражат алудың жеткіліктілік шегінің күрт өсуіне қатысты пікір білдірді
Мұрат Әбенов бұл көрсеткіштерді кезең-кезеңімен өзгерту керек еді деп есептейді
Зейнетақы жинақтарын пайдалану үшін ең төменгі жеткіліктілік шегінің жоғарылауы Мәжіліс пен Үкіметте түрлі пікір тудырды. Бірі бұл өзгерістерді өз қаражатын пайдаланып үлгермеген азаматтар үшін әділетсіздік деп санаса, енді бірі ережелерді қатайту болашақ зейнеткерлердің қаржылық тұрақтылығын қамтамасыз ету үшін қажет деп сенеді, деп жазады Kapital.kz іскерлік ақпарат орталығының тілшісі.
Мәжіліс депутаты Мұрат Әбенов зейнетақы жинақтарын пайдалану бағдарламасы көптеген қазақстандықтарға нақты пайда әкелгенін атап өтті, алайда қаражатты алу ережелерінің күрт өзгеруін сынға алды.
«Бағдарлама өте жақсы, адамдарға шынымен көмектесті. Әділеттілік тұрғысынан алғанда, халықтың бір бөлігі алып, екінші бөлігі алып үлгермеген кезде ереженің кенеттен өзгеруіне мен, әрине, қарсымын», — деді депутат.
Оның айтуынша, адамдар өздерінің қаржылық жоспарларын алдын ала ыңғайлап үлгеруі үшін кез келген осындай өзгерістер біртіндеп енгізілуі керек.
«Жалпы, кенеттен қабылданатын және адамдарға, олардың қаржылық жоспарларына зиян келтіретін кез келген шешімге мен, әрине, қарсымын. Меніңше, егер азаматтардың бір бөлігіне рұқсат берілсе, онда басқаларға да мүмкіндік беру керек немесе уақыт беріп, «міне, сендерге тағы үш жыл уақыт, содан кейін бұл шекті біртіндеп өзгертеміз» деп айту қажет еді», — деп қадап айтты Мұрат Әбенов.
Сонымен қатар парламентші бұл бағдарламаны өзі де пайдаланғанын мойындады.
«Мен емделуге алып үлгердім, ішінара балаларыма көмектестім», — деді ол.
Мәжіліс депутаты Магеррам Магеррамов болса басқаша пікір білдірді. Оның ойынша, жеткіліктілік шегін көтерудің қисынды негізі бар және ол болашақ зейнеткерлердің мүддесін қорғауға бағытталған.
«Егер эмоцияны ысырып қойып, саралап қарайтын болсақ, бұл негізінен адамдар зейнет жасына жеткенде олардың жинақтары болуын қамтамасыз етуге бағытталған», — деді депутат.
Ол зейнетақы қаражатына еркін қол жеткізу зейнетақы жүйесінің өзіне қауіп төндіретінін атап өтті.
«Қарап тұрсаңыз, егер қазір бәрін осылай талан-таражға салуға жол берсек, кейін зейнетке шығатын уақыт келгенде оларда жинақ болмайды, бұл қайтадан мемлекетке үлкен салмақ түсіреді», — деді Магеррам Магеррамов.
Бұл ретте ол да бұған дейін жинақтарының бір бөлігін пайдаланғанын айтты.
«Мен, мысалы, зейнетақы жинағыма пәтер алдым. Анама пәтер сатып алып бердім», — деді депутат.
Ал Ұлттық экономиканың бірінші вице-министрі Азамат Амрин зейнетақы жинақтарын пайдалану механизмінің жұмыс істеп тұрғанына бірнеше жыл болғанын, сондықтан бұл мүмкіндікті пайдалана алатын азаматтардың көпшілігі оны қолданып қойған болуы мүмкін екенін еске салды.
«Білесіз бе, бұл бағдарламаның енгізілгеніне көп уақыт болды. Мүмкіндік, қателеспесем, 2022 жылдан бері бар. Яғни, алуға мүмкіндігі болғандардың бәрі алып үлгерген шығар», — деді Азамат Амрин.
Оның мәліметінше, бағдарлама басталғаннан бері зейнетақы жүйесінен 5 триллион теңгеден астам қаражат алынған.
«Менің білуімше, 5 триллион теңгеден астам ақша шешіп алынды. Әрине, бұл зейнетақы төлемдеріне әсер етеді», — деп атап өтті вице-министр.
Сондай-ақ Азамат Амрин жинақтарының бір бөлігін алу құқығын өзі де пайдаланғанын хабарлады.
«Мен зейнетақымды алып үлгердім. Бірақ оны әлі жұмсамадым, Отбасы банкінде ұстап отырмын», — деді ол.
Осылайша, жаңа жеткіліктілік шегі төңірегіндегі талқылау зейнетақы қаражатын пайдалану мәселесінде пікірлердің екіге жарылғанын көрсетеді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
