Қазақстандықтар БЖЗҚ-дан зейнетақы жинағының артық бөлігін алуды екі есе арттырды
Қор бір айда 119,1 мың өтінішті орындады, мамыр айындағы белсенділіктің күрт өсуі соңғы уақыттағы ең жоғары көрсеткіш болды
2026 жылдың мамыр айында тұрғын үй жағдайын жақсарту үшін біржолғы зейнетақы төлемдерін алуға мақұлданған өтініштер саны 119,1 мыңға жетті. Бұл сәуір айымен салыстырғанда екі есе көп. Ал жалпы сома 117,8 млрд теңгені құрады. Екі көрсеткіш те абсолютті рекорд орнатпағанымен, өткен кезеңдердегі жоғары көрсеткіштер аясында айтарлықтай ерекшеленіп тұр, деп хабарлайды DATA HUB.
Мұндай серпіліске не себеп болғаны белгілі, сарапшылардың пайымдауынша, мамырда ең төменгі жеткіліктілік шегінің жаңа деңгейі жуық арада жарияланады деп күтілген еді.
«Өзгертілген әдістеме бойынша есептелген сомалар маусымның басында жарық көрді. Бұл ретте олар салымшының жасына байланысты 79%-ға және одан да көпке, айтарлықтай өсті. Құзырлы органдар бірнеше рет мәлімдегендей, бұған азаматтардың болашақ зейнетақысын қамтамасыз ету қажеттілігі негізгі себеп болды. Мамыр айында қаражатты алудың басты бағыты дәстүрлі түрде тұрғын үй құрылыс жинақ жүйесіндегі салымдарды толықтыру болды — барлық өтініштің жартысына жуығы, сондай-ақ ипотеканы ішінара өтеудің 21%-ы Отбасы банкі жүйесінде іске асты. Айтпақшы, банк мамырдың аяғында қазақстандықтарға шекті деңгейдің көтерілетінін тағы бір мәрте ескертіп, қолжетімді жинақтарды баспана алу мақсаттарына жұмсауға шақырған болатын», — деп атап өтеді DATA HUB мамандары.
Жаңа шектеулерді ескерсек, мамыр айы қаражатты белсенді түрде алудың соңғы айы болатыны анық. Өткен бес жылдан астам уақыт ішінде тұрғын үй мен емделуге (емделуге арналған төлемдер 2025 жылдың күзінен бастап тоқтатылған) 5,8 трлн теңгеден астам жинақ пайдаланылды.
БЖЗҚ мәліметінше, ең қомақты көлем 2021 жылға тиесілі болды — 2,6 трлн теңге, алайда белсенділіктің жаңа серпіні 2024 жылдың екінші жартысынан бастап та байқалды. Естеріңізге сала кетейік, бұл белсенділікке зейнетақы жинағын алу жүйесіне жаңа шектеулер енгізу мәселесінің көпшілік талқысына шығарыла бастауы себеп болған еді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
