Kaspi.kz директорлар кеңесі бір акцияға 850 теңге көлемінде дивиденд төлеуді ұсынды
Акционерлерге компанияның таза пайдасының 64%-ы бағытталады
Kaspi.kz директорлар кеңесі 2026 жылдың бірінші тоқсанының қорытындысы бойынша акционерлерге бір ADS-ке (америкалық депозитарлық акция) 850 теңге көлемінде дивиденд төлеуді ұсынды. Дивиденд мөлшерін финтех-холдинг акционерлері мақұлдауы тиіс, деп хабарлайды Kapital.kz іскерлік ақпарат орталығы компанияның AIX биржасында жарияланған 2026 жылдың бірінші тоқсанына арналған аудиттелмеген шоғырландырылған есебіне сілтеме жасап.
«Төлем көлемі акционерлер мақұлдаған жағдайда таза пайданың 64%-ын құрайды. Бұл компанияның ақша ағынын қалыптастыру мүмкіндігіне және өсу перспективасына деген сенімді көрсетеді», – деді финтех-холдингтің тең құрылтайшысы Михаил Ломтадзе.
Түсім үштен бірге өсті
Компанияның түсімі 2025 жылдың бірінші тоқсанымен салыстырғанда 31%-ға өсіп, 1,1 трлн теңгеге (2,3 млрд доллар) жетті.
«Түсімнің өсуі тапсырыс беру жиілігінің артуымен және электронды коммерция саласындағы қосымша қызметтердің қарқынды дамуымен байланысты. Сондай-ақ бұл үдеріске финтех-несиелеу портфелінің айтарлықтай өсуі әсер етті», – делінген қаржылық есепте.
E-commerce сегментіндегі сату көлемі бір жылда 41%-ға артып, 1,3 трлн теңгені (2,6 млрд доллар) құрады. Ал сатып алулар саны 43%-ға көбейген.
«Электронды коммерцияны монетизациялау көрсеткіші жақсара түсті. E-commerce бағытындағы кіріс бір жылда 58%-ға өсіп, 394 млрд теңгеге (824 млн доллар) жетті. Ал жарнама мен жеткізуді қамтитын қосымша қызметтерден (VAS) түсетін табыс 73%-ға артты. Бір тұтынушының сатып алу саны 15-ке жетті. 2025 жылдың бірінші тоқсанында бұл көрсеткіш 10,4 болған», – делінген құжатта.
Есепте Kaspi.kz-тің жоғары табысты компания болып қала беретіні атап өтілген. EBITDA көрсеткіші бір жылда 9%-ға өсіп, 368 млрд теңгені (768 млн доллар) құрады.
«Компанияның шоғырландырылған таза пайдасы 252 млрд теңге (526 млн доллар) деңгейінде тұрақты сақталды, алайда жылдық мәнде 1%-ға төмендеді. Бұған былтыр Қазақстанда депозиттер бойынша ең жоғары мөлшерлемелердің көтерілуінен кейін депозиттік қаржыландыру шығындарының артуы және түркиялық Hepsiburada маркетплейсін консолидациялау әсер етті», – делінген есепте.
Түркиядағы бизнес айналымы қандай
Еске салайық, финтех-холдинг портфелінде түркиялық Hepsiburada маркетплейсі бар. Компания оның 65,41% бақылау пакетін 2025 жылдың қаңтарында сатып алған. Мәміле сомасы шамамен 1,1 млрд долларды құрады.
Қаржылық есепте Kaspi.kz Түркия нарығындағы жағдай туралы да мәлімет берді.
«Түркия – халқы 85 млн адам болатын нарық және біздің келесі өсу кезеңіміздің маңызды бөлігі. Қазір оған электронды коммерциядағы жалпы сатылым көлемінің 50%-ы тиесілі. Біз Түркияда Kaspi-дің өнім мәдениеті мен электронды коммерциядағы тәжірибесін енгізіп жатырмыз», – делінген есепте.
Еске салайық, 2026 жылдың сәуірінде Қытайдың ірі технологиялық компаниясы Tencent, Михаил Ломтадзе, финтех-холдингтің жетекші менеджмент мүшелері, Spice Expeditions финтех-инвестициялық компаниясы және АҚШ-тағы Washington University мен WISIMCO/University of Wisconsin Foundation университеттік инвестициялық қорлары Baring Fintech Venture Funds қорынан финтех-холдингтің шамамен 6 млн америкалық депозитарлық акциясын сатып алғаны белгілі болды.
KASE мәліметіне сәйкес, 2026 жылғы 1 сәуірдегі жағдай бойынша Baring Funds компанияның орналастырылған жай акцияларының 22,30%-ына, Михаил Ломтадзе – 23,04%-ына, ал Вячеслав Ким 20,75%-ына иелік еткен.
Kaspi.kz онлайн төлемдер мен P2P-аударымдар, жеке қаражатты басқару және онлайн сауда сервистерін біріктіреді. Топ құрамына «Kaspi Магазин» ЖШС, Kaspi Bank, «Kaspi Pay» ЖШС, «Kaspi Travel» ЖШС және басқа да компаниялар кіреді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
