Гонконг биржасымен «Қазақстан темір жолы» компаниясының IPO параметрлері талқыланды
2025 жылдың қорытындысына сәйкес, HKEX Initial Public Offering көлемі бойынша әлемде бірінші орынға ие болды
Гонконг қор биржасы «Қазақстан темір жолы» АҚ (ҚТЖ) әлеуетті IPO-сы үшін халықаралық алаңдардың бірі ретінде қарастырылуда. Бұл туралы «Самұрық-Қазына» қорының басқарма төрағасы Нұрлан Жақыпов пен Hong Kong Exchanges and Clearing (HKEX) бас директоры Бонни Й. Чанның Гонконгтегі келіссөздерінде белгілі болды деп хабарлайды Kapital.kz іскерлік ақпарат орталығы қордың баспасөз қызметіне сілтеме жасап.
«Тараптар болашақ орналастырудың ықтимал параметрлерін, соның ішінде мәміле құрылымы мен реттеушілік талаптарды талқылады», - делінген хабарламада.
HKEX әлемдегі ең ірі биржалық топтардың бірі және капитал тартуға арналған жетекші халықаралық алаң болып табылады. 2025 жылдың қорытындысы бойынша биржа IPO көлемі бойынша әлемде бірінші орынға ие болып, Азияның негізгі қаржылық хабы және жаһандық капитал нарықтарының басты орталықтарының бірі мәртебесін растады.
Еске салсақ, Шанхайда өткен AIFC Connect аясындағы капитал нарықтары бойынша панельдік сессияда «Самұрық-Қазына» қорының Қытайдағы өкілдігінің басшысы Сәкен Мұратқлы «Қазақстан темір жолы» IPO-ға шыққан кезде Гонконг халықаралық алаңдардың бірі болатынын мәлімдеген еді.
2026 жылдың соңында ҚТЖ-ның қарыздарын өтеу үшін IPO-ға шығару жоспарланған. Бұған дейін теміржол операторы 2026 жылдың мамыр айында IPO өткізіп, шамамен 1 млрд доллар тартуы мүмкін екені хабарланған болатын. Инвесторларға ұлттық компания акцияларының 25%-на дейін ұсынылуы мүмкін.
Бұдан бұрын КТЖ AIX-те облигацияларды орналастыру арқылы 1,6 млрд юань тартқан болатын.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
